DKT BITEKO AONGOZA WANANCHI WA BUKOMBE KUAGA MIILI 7 YA WANAFUNZI WALIOFARIKI KWA AJALI YA RADI

Imewekwa: January 30th, 2025

Naibu waziri Mkuu na waziri wa nishati ambaye pia ni Mbunge wa jimbo la Bukombe Dkt. Doto Mashaka Biteko leo tarehe 30 Januari 2025 amewaongoza wakazi wa Bukombe katika zoezi la Kuaga miili 7 ya wanafunzi wa Shule ya Sekondari Businda waliofariki kwa ajali ya radi iliyotokea jumatatu ya tarehe 27 Januari,  2025 wakiwa Shuleni.

Dkt.Biteko ameongoza zoezi hilo la kuaga na kukabidhi ubani kwa wafiwa lililofanyika katika viwanja vya Shule ya Sekondari Businda huku akiwataka kuwa wavumilivu hasa kipindi hiki cha majonzi.

“Tumeambiwa kwamba tushukuru kwa kila jambo, leo Mungu ametukutanisha katika hali ya majonzi, jambo hili litukumbushe kutenda mema wakati wote na tuamini kwamba yeye ndiye mwenye uweza wa kutupa faraja”.

Aidha Biteko amesema kuwa Rais wa Jamhuri ya Muungano wa Tanzania, Mhe. Dkt. Samia Suluhu Hassan baada ya kupokea taarifa za msiba huo mzito amekuwa akifuatilia kwa karibu na kutoa maelekezo kwa ajili ya kuzifariji familia za wafiwa, wana Bukombe na Taifa kufuatia kuondokewa na vijana waliokuwa katika safari ya kutafuta elimu.

Naye Mkuu wa Wilaya ya Bukombe, Mhe. Paskasi Muragili ameishukuru Idara ya afya kwa utayari na uharaka wa utoaji huduma kwa wanafunzi wote walioathirika katika tukio hilo.

Wanafunzi waliofariki  katika tukio hilo la radi  ni Erick Emmanuel Akonaay (17), Nikas Paul Tompoli (18) Gabriel Daud Makoye (17), Doto Marco Masasi (18), Asteria Reonard Mkina (16), Peter Nkinga Manyanda (17) na Erick Martine Bugalama (16).