Baraza la Wahe.Madiwani Latoa Zawadi kwa Shule zilizofanya vizuri.

Imewekwa: May 20th, 2022

Baraza la Wahe. Madiwani  limetoa vyeti vya pongezi  kwa shule za serikali na binafsi zilizofanya vizuri katika matokeo ya Mtihani wa Taifa wa kidato cha nne 2021 pamoja na zawadi kwa walimu waliofaulisha masomo yao kwa asilimia 100.

Vyeti vya pongezi hizo pamoja na zawadi vimetolewa tarehe 18 Mei, 2022 katika  Mkutano wa Baraza la Madiwani la kupitia na kujadili taarifa za robo ya tatu ( Januari- Machi) kwa mwaka wa fedha 2021/2022. 

Naye Makamu Mwenyekiti wa Halmashauri ya Wilaya ya Bukombe kwa niaba ya Mwenyekiti wa Halmashauri hiyo Mhe.Leokadia Kasase  amewashukuru sana walimu kwa kuinua kiwango cha elimu.

" Walimu wa Halmashauri ya Wilaya ya Bukombe mmetuheshimisha sana. Tunawashukuru sana kwa kuinua Taaluma katika wilaya yetu na muendelee kuwa na moyo huo huo wa kizalendo wa kujitolea katika masuala ya ufundishaji na ujifunzaji."

Aidha ameipongeza shule ya sekondari Bulega kwa kuongoza kiwilaya katika matokeo ya kidato cha nne katika kundi la shule za serikali.

" Kipekee naipongeza shule ya sekondari Bulega kwani shule hii kwa miaka miwili mfululizo ilikuwa  inakuwa ya mwisho na sasa mmeibuka kidedea. Hongereni sana. "

Naye Diwani wa Kata ya Bulega Mhe.Erick Kagoma ameishukuru serikali kwa kupeleka umeme katika shule yake kwani wanafunzi wamekuwa na tabia ya kujisomea nyakati za usiku na kupelekea kufanya vizuri katika mitihani.

"Tunaishukuru sana serikali kwa kutuletea umeme katika shule yetu ya sekondari Bulega ambao umehamsha moyo wa wanafunzi kujisomea nyakati za usiku na kupandisha ufaulu katika shule yetu."

Shule ya wavulana ya Seminari ya Queen of Apostle katika shule za sekondari binafsi iliongoza kwa kushika nafasi ya kwanza kiwilaya, kimkoa na Kitaifa katika kundi la watahiniwa chini ya wanafunzi 40 huku ikifuatiwa na shule ya binafsi Emink ambayo ilishika nafasi ya pili kiwilaya.

Kwa upande wa shule za serikali, shule ya sekondari Bulega ilishika nafasi ya kwanza kiwilaya na ikifuatiwa na shule ya sekondari Lyambamgongo na iliyoshika nafasi ya tatu ni shule ya sekondari Musasa.

Vilevile katika Matokea ya Mtihani wa Taifa wa kidato cha nne 2021 Halmashauri ya Wilaya ya Bukombe iliongoza kimkoa kwa kushika nafasi ya kwanza.

https://www.instagram.com/p/CdwiSFXIWMq/?igshid=MDJmNzVkMjY=