BUKOMBE INATARAJIA KUTOA HATI MILIKI 50,000 KUPITIA MRADI WA LTIP

Imewekwa: June 27th, 2024

Mradi wa Uboreshaji Usalama wa Milki za Ardhi (LTIP) unaotekelezwa na Wizara ya Ardhi, Nyumba na Maendeleo ya Makazi unatarajia kutambua, kupanga, kupima na kumilikisha viwanja visivyopungua 50,000 katika kata 9 za Halmashauri ya Wilaya ya Bukombe.

Hayo yamebainishwa leo tarehe 27 Juni, 2024 na Mkuu wa Wilaya ya Bukombe Mhe. Paskasi Muragili wakati wa ufunguzi wa mkutano wa wa kujadili utekelezaji wa Mradi wa Uboreshaji Usalama wa milki za ardhi uliofanyika katika ukumbi wa CCM Wilaya.

Aidha Muragili amewataka wadau wa ardhi kutumia fusa hiyo adimu ili kupata milki za ardhi na kuboresha usalama wa milki hizo kipindi ambacho mradi utakapokuwa unatekelezwa.

“Tushirikiane kutekeleza vizuri mradi huu ili tuweze kupata matokeo chanya katika utekelezaji wa mradi huu”.

Vilevile Muragili ameongeza kwa kusema kuwa upatikanaji wa hati milki utaongeza thamani ya ardhi na mapato ya halmashauri yataongezeka.

Kwa upande wake kamishna wa ardhi msaidizi mkoa wa Geita Bw. Rugambwa Banyikila amesema kuwa mradi huu utaenda kutatua changamoto baina ya wakulima na wafugaji kwani wananchi watakuwa na uhakika wa milki zao.

Aidha Banyikila amesema kuwa katika mradi huu wananchi wataenda kupata hati za kielektroniki tofauti na ilivyokuwa hapo awali.

Naye Afisa Mipango miji Wizara ya Ardhi, Nyumba na Maendeleo ya Makazi Bw. Paulo Kitosi amesema kuwa kwa awamu hii ya kwanza ya kuanzia Julai 2024, mradi unatarajia kutoa hati milki zaidi ya 30,827 ambapo viwanjwa vitapangwa na kupimwa.

Kata  zinazotarajiwa kupatiwa hati milki katika mradi huu ni Kata ya Lyambamgongo, Igulwa, katente, Bulega, Runzewe Mashariki, Runzewe Magharibi, Bulangwa, Namonge na Uyovu.