DC MURAGILI ASISITIZA KUZINGATIA ULAJI WA MAKUNDI SITA YA VYAKULA

Imewekwa: October 31st, 2024

Mkuu wa Wilaya ya Bukombe Mhe. Paskasi Muragili amewataka Wananchi kuzingatia mlo kamili wenye makundi yote sita ya vyakula ili kuwa na jamii yenye Afya bora.

Hayo ameyasema tarehe 30 Oktoba, 2024 wakati wa maadhimisho ya Siku ya Lishe Kitaifa ambapo kwa Wilaya ya Bukombe yameadhimishwa katika Kijiji cha Namalandula Kata ya Namonge.

“Ninaomba tuzingatie maelekezo tunayopewa na wataalamu katika kuandaa Lishe bora hasa kwa watoto kwani mtoto asipopata Lishe nzuri hata makuzi yake hayatakuwa mazuri na pia ubongo wake hautakuwa imara”.

Aidha Muragili amewataka wakina mama wajawazito kuzingatia Lishe kwa kipindi cha siku 1000 za mwanzo tangu mtoto akiwa tumboni ili kuondoa tatizo la udumavu wa akili na kumjengea mtoto Afya bora.

Vilevile Muragili amewataka Wananchi kutumia elimu waliyopatiwa katika kuandaa Chakula na kuendelea kushiriki kwa wingi katika Siku ya Afya ya Lishe (SALIKI)yanayofanyika kila robo kwa kila kijiji.

Naye Afisa Afya (W) Ritha Mlay kwa niaba ya Afisa Lishe amesema kuwa lengo la maadhimisho hayo ni kuijengea jamii uelewa juu ya maswala ya Lishe na kutoa elimu sahihi ya ulaji kwa kuzingatia mwongozo wa Kitaifa wa ulaji wa chakula.

Pia amesema kuwa takwimu za mwaka 2023/2024 zinaonyesha asilimia 147 ya watoto chini ya miaka mitano wamepewa mayone ya nyongeza za vitamin A na pia idadi ya watoto wenye utapiamlo mkali imepungua kutoka 23 kwa mwaka hadi kufikia watoto 15 sawa na asilimia 0.01 aidha wajawazito 57812 wamepewa vidonge vya kuongeza wingi wa damu sawa na asilimia 97.61 ya wajawazito wote.

Maadhimisho hayo yameenda sambamba na kauli mbiu isemayo Mchongo ni Afya yako, Zingatia unachokula.