DC MURAGILI AWATAKA WANANCHI KUSHIRIKI KATIKA MIRADI YA MAENDELEO.

Imewekwa: August 21st, 2024

Mkuu wa Wilaya ya Bukombe Mhandisi Paskasi Muragili amewataka wananchi wa kijiji cha Msasa Kata ya Runzewe magharibi kuendelea kushiriki na kulinda miradi ya maendeleo na kutoweka matabaka miongoni mwao.

Ameyasema hayo tarehe 20 Agosti, 2024 wakati akizungumza na wananchi katika Ziara yake ya kusikiliza na kutatua kero za wakazi wa kata hiyo.

“ Ni wajibu wa kila mwananchi kuunga mkono juhudi za Serikali kwa kuhakikisha tunashiriki kikamilifu kwenye shughuli za miradi ya maendeleo inayoendelea katika kata yetu, hivyo niwaombe muitunze miradi hii ili iweze kudumu kwa muda mrefu”.

Aidha Katika Ziara hiyo Muragili ametembelea Ujenzi wa Ghala la Kuhifadhi Nafaka lililopo katika kijiji cha Msangila ambapo amesema uwepo wa ghala hilo litaenda kupunguza walanguzi wa bei za nafaka kwa wakulima  na kumuwezesha mkulima kulima kilimo cha kisasa na kumuinua kiuchumi.

“Tutaenda kuongeza mapato kwa wakulima kutoka kuzalisha gunia 2 hadi kufikia gunia 20 kwa kila hekari”.

Vilevile Muragili pia ametembelea Mradi wa Ujenzi wa Vyumba 3 vya Madarasa na Vyoo Matundu 8 katika Shule ya Sekondari Kazilamuyaye wenye gharama ya Shilingi Milioni 89.4 na kuagiza hadi kufikia tarehe 31 Agosti ,2024 wanafunzi wa kidato cha tatu wawe wameanza kusoma shuleni hapo.

Ziara ya Mkuu wa Wilaya katika Kata ya Runzewe Magharibi ni muendelezo wa Ziara zake katika Kata mbalimbali kwaajili ya kusikiliza/ kutatua kero za wananchi na kukagua miradi ya maendeleo.