DKT. BITEKO AMEWATAKA WANANCHI KUJIANDIKISHA KWENYE DAFTARI LA KUDUMU LA WAPIGA KURA

Imewekwa: July 22nd, 2024

Naibu Waziri Mkuu na Waziri wa Nishati,  Mhe. Doto Biteko amewataka wananchi wa Wilaya ya Bukombe kujitokeza kwa wingi kwa ajili ya kujiandikisha na kuboresha taarifa  kwenye daftari la kudumu la wapiga kura.

"Wale wote wenye sifa ya kuandikishwa na  wenye uhitaji wa kuboresha taarifa jitokezeni ili tupate haki ya kikatiba ya kupiga kura."

Hayo ameyasema tarehe 21 Julai, 2024 wakati akiongea na wananchi wa Kata ya Lyambamgongo Wilayani Bukombe Mkoani Geita.

Aidha amewasisitiza wananchi kuhakikisha wanachagua viongozi  bora ambao watawaletea maendeleo.

" Mwaka huu ni mwaka wa uchaguzi wa Serikali za Mitaa, hakikisheni mnatumia nafasi hii vizuri. Msichague viongozi kwa sababu ya kabila wala dini bali mkachague viongozi kwa kufuata misingi ya haki na watakaowaletea maendeleo."

Pia amewapongeza watumishi wa Wilaya ya Bukombe kwa kutekeleza majukumu yao vizuri hasa kwa kuhakikisha tunapata matokeo mazuri ya kidato cha sita.

" Tumefanya vizuri katika matokeo ya kidato cha sita 2024 kwa kutokomeza daraja IV na sifuri na kuhakikisha shule ya sekondari Bukombe inashika nafasi ya 48 Kitaifa."

Vile vile amewapongeza Waheshimiwa Madiwani na Wakuu wa Divisheni na Vitengo kwa  uibuaji wa miradi na usimamizi mzuri wa miradi ya maendeleo.

" Hongereni sana kwa kufanya kazi kwa ufanisi, leo tunaiona Bukombe mpya ambapo hapo zamani mambo yalikuwa magumu kwani kulikuwa hakuna barabara , umeme wala zahanati za kutosheleza mahitaji ya wananchi."

Naibu Waziri Mkuu na Waziri wa Nishati, Mhe.Doto Biteko katika Wilaya ya Bukombe anaendelea na ziara yake leo tarehe 22 Julai, 2024  kataka kata ya Namonge kijiji cha Ilyamchele na  tarehe 23 Julai, 2024 katika kata ya Runzewe Magharibi kijiji cha Msangira.

#KusemaNaKutenda