DKT. BITEKO ASISITIZA WAZAZI KUPELEKA WATOTO SHULE

Imewekwa: June 7th, 2024

Naibu Waziri Mkuu na Waziri wa Nishati Mhe Dkt. Doto Mashaka Biteko amewataka wazazi kuwapeleka watoto Shule ili waweze kupata elimu.

Hayo ameyasema tarehe 7 Mei, 2024 wakati akiongea na Wananchi wa Kata ya Bugelenga ikiwa ni muendelezo wa ziara yake katika Wilaya ya Bukombe.

“Hakuna mahali popote mtakapofanya maendeleo kama hatupeleki watoto wetu shule,ni aibu kusikia kuwa kuna watoto wamefichwa ili wasiende shule”.

Aidha Biteko amesema kuwa Mhe. Rais Samia Suluhu Hassan ametoa fedha nyingi za kujenga shule za Msingi na Sekondari ili watoto waweze kusoma.

“Kazi yetu sisi ni kuwafanya watoto wetu waweze kupata elimu ili tupate wataalamu wa fani mbalimbali katika nchi yetu ili tupate maendeleo”.

Vilevile Dkt. Biteko ameahidi kutoa mabati 135 na mifuko ya saruji 400 kwa ajili ya kukamilisha ujenzi wa vyumba vya madarasa katika kata ya Bugelenga.

Kwa upande wake Diwani wa kata ya Bugelenga Mhe. Donald Lubigisa amemshukuru Dkt. Biteko kwa kufanya ziara katika kata yake na ameiomba Serikali  kuendelea kupeleka fedha kwa ajili ya miradi ya maendeleo.