KIKAO CHA BARAZA LA MADIWANI ROBO YA KWANZA KWA KIPINDI CHA JULAI-SEPTEMBA 2024/2025.

Imewekwa: December 4th, 2024

Baraza la Madiwani Halmashauri ya Wilaya ya Bukombe Desemba 3, 2024 limekutana katika mkutano wake wa kawaida wa robo ya kwanza kipindi cha Julai-Septemba 2024/2025.

Kikao hicho kimefanyika katika Ukumbi wa mikutano wa Halmashauri ambapo hoja mbalimbali zilijadiliwa na kutolewa ufafanuzi.

Akizungumza katika baraza hilo Mwenyekiti wa Halmashauri ya Wilaya ya Bukombe ambaye pia ni Diwani wa Kata ya Bulangwa Mhe Yusuph Mohamed ametoa rai ya kuhakikisha kasi ya ukusanyaji mapato inaongezeka ili kufikia lengo na kuleta maendeleo.

Aidha Mhe Yusuph amesema kuwa zabuni itangazwe ili kupata mawakala wa kukusanya ushuru kwenye maegesho ya magari katika stendi ya Ushirombo na Runzewe ili kuongeza mapato katika stendi hizo.

Kwa upande wake Mkurugenzi Mtendaji wa Halmashauri ya Wilaya ya Bukombe Lutengano Mwalwiba amesema kuwa Halmashauri itaendelea kutatua changamoto zilizowasilishwa na kusisitiza kuwa kasi kubwa itaelekezwa kwenye usimamizi wa miradi ili iweze kukamilika kwa wakati.

Naye Mkuu wa Wilaya ya Bukombe Mhe. Paskasi Muragili amewataka wataalamu wa Idara ya Maendeleo ya Jamii kuhakikisha mchakato wa utoaji wa mikopo ya asilimia 10 unafanyika kwa haraka ili kuwainua wananchi kiuchumi.

Kikao hicho kimehudhuriwa na viongozi mbalimbali, Kamati ya Ulinzi, wakuu wa Idara na vitengo pamoja na wakuu wa Taasisi za umma.