Kikao kazi cha Maafisa Ugani Halmashauri ya Wilaya ya Bukombe

Imewekwa: October 19th, 2023

Mkurugenzi Mtendaji wa Halmashauri ya Wilaya ya Bukombe Lutengano Mwalwiba amewapongeza Maafisa Ugani wa Halmashauri ya Wilaya ya Bukombe kwa kazi kubwa wanayoifanya ya kuwahudumia wakulima katika maeneo mbalimbali.

Pongezi hizo amezitoa tarehe 19 Octoba ,2023 katika kikao kazi cha kuwakumbusha majukumu yao katika kipindi cha msimu wa kilimo kwa mwaka 2023/2024.

Aidha amewataka Maafisa Ugani kushiriki kikamilifu katika suala la  ukusanyaji wa mapato yatokanayo na Kilimo ili kuongeza mapato ya halmashauri.

 “Ni heshima na utu kuhakikisha kila mmoja anatimiza wajibu wake katka kukusanya mapato yatokanayo na mazao ya kilimo.”

Kwa upande wake Mkuu wa Divisheni ya Kilimo, Mifugo na Uvuvi Zedekia Solomoni amewataka maafisa ugani kuhakikisha wanawahamasisha wakulima katika maeneo yao ili kila kaya iweze kulima angalau hekari mbili za Pamba.

"Hakikisheni mnahamasisha kila kaya kulima walau hekali mbili za pamba ili wananchi waweze kujikwamua kiuchumi."

Naye Mtaalamu kutoka Bodi ya Pamba Wilaya ya Bukombe, James Edmund amesema katika msimu huu wa kilimo, Serikali imekwishatoa pembejeo kama vile mbegu, mbolea na dawa kwa wakulima wote.

Aidha Afisa Kilimo wa Kata ya Runzewe Mashariki Hilary Munyuku ameishukuru Divisheni ya Kilimo, Mifugo na Uvuvi kwa kuwakumbusha majukumu yao na ameahidi kuwahimiza wakulima kufuata mbinu bora za kilimo ili kukidhi mahitaji ya chakula na kukuza uchumi.