Misitu ni Kichocheo cha Taifa Letu - DC Nkumba

Imewekwa: June 17th, 2021

Mkuu wa Wilaya ya Bukombe Mhe.Said Nkumba  amewataka wananchi kuacha tabia ya kuvamia maeneo ya uhifadhi na kuanzisha shughuli za kibinadamu kinyume na sheria kwani kwa kufanya hivyo kunarudisha nyuma shughuli za uhifadhi katika Wilaya ya Bukombe.

"Misitu ni kichocheo cha Uchumi katika Taifa letu tuache tabia ya kuvamia maeneo ya hifadhi kinyume na sheria"

Nkumba ameyasema hayo  tarehe 17 Juni, 2021 akiwa na  kamati ya Ulinzi na Usalama Wilaya wakati akiongoza doria ya kuangalia hali ya uhifadhi katika Msitu wa Bihalamulo - Kahama uliopo halmashauri ya Wilaya ya Bukombe.

Aidha  ameshuhudia uhalibifu Mkubwa unaotokana na shughuli za kibinadamu zikiwemo shughuli za kilimo, Makazi na uchimbaji madini katika maeneo ya  Bwawani, Mabatini, Mabogo, Njia tatu na Mwanikembo.Hata hivyo ametoa siku 14 kwa wavamizi wa maeneo ya hayo kuhama mara moja na amewataka kuanzisha shughuli za kibinadamu kutika maeneo mengine ambayo hayaingiliani na uhifadhi.

" Lazima tuheshimu sheria za nchi,  sisi kama Serikali hatutaki kutumia nguvu kwa wananchi wetu hivyo basi natoa siku 14 za kuhama kwa hiyari."

Aidha amelaani tabia ya baadhi ya watu ambao ni matapeli kuhalalisha maeneo ya uhifadhi na kuyafanya kuwa mazingira halali ya shughuli za kilimo, mifugo na makazi ili kuvuruga mahusiano mazuri kati ya wananchi na serikali yao.

Kwa upande wake Muhifadhi Misitu Wilaya ya Bukombe Emiliana Alex amewapongeza wananchi wa Nampalahala kwa ushirikiano mzuri wanaoutoa kwenye maeneo ya uhifadhi na amewataka kuendelea kutoa taarifa ili kuendelea kulinda misitu.

"Sisi kama serikali tayari tumeishatengeneza Madawati 200 kwa ajili ya shule mbili na hii ndiyo faida ya kutunza hifadhi zetu."

Wilson Maganigo mkazi wa kitongoji cha Idoselo ameiomba serikali kuweka mipaka katika kitongoji chao ili wasiingilie na maeneo ya uhifadhi.