Wananchi wa Kata ya Ng'anzo Waahidiwa Milioni Tatu

Imewekwa: February 16th, 2022

Mkurugenzi mtendaji wa halmashauri ya wilaya ya Bukombe Lutengano Mwalwimba amewaahidi wananchi wa kata ya Ng'anzo kulipa shilingi milioni 3 kwa ajili ununuzi wa hekari zaidi ya sita za upanuzi wa eneo la shule mpya ya sekondari Ng'anzo kupitia mapato ya ndani ambalo lilitakiwa kulipwa kupitia michango ya wananchi.

Mwalwimba alifikia maamuzi hayo baada ya kuona mwitikio wa wananchi waliojitokeza kuchimba msingi wa vyumba 8 vya madarasa , matundu 20 ya vyoo, maktaba, Jengo la TEHAMA na Jengo la utawala wakati wa uzinduzi wa ujenzi wa shule mpya ya Nga'nzo tarehe 15 Februari, 2022.

Akiongea katika zoezi hilo Diwani wa kata ya Ng'anzo Mhe. Mashaka Shig'wenda alisema, "Wananchi walichanga shilingi milioni 9.5 kwa ajili ya kununua eneo la shule lenye ukubwa wa hekari 22 huku mahitaji yakiwa ni hekari 28. Halmashauri ikitulipia milioni 3 tutakuwa tumetatua changamoto ya ufinyu wa eneo.’’

Naye Mkuu wa wilaya ya Bukombe Mhe. Said Nkumba amewashukuru wananchi kwa ushiriki wao wa kuja kumuunga mkono Mhe.Rais wa Jamhuri ya Muungano wa Tanzania pia amewaomba wananchi kuendelea moyo huo huo wa kizalendo wa kushiriki katika utekelezaji wa miradi ya maendeleo.

"Tuendeleze tabia yetu ya kujitolea, kwenye suala la kujitolea hatutarudi nyuma na hii imekuwa ni tabia ya wanabukombe ya kuona miradi inayoletwa na serikali ni ya kwetu."

Halmashauri ya Wilaya ya Bukombe awamu ya kwanza ilipokea kiasi cha shilingi milioni 470 na inatarajia kupokea tena kiasi cha shilingi milioni 130 kwa ajili ya kukamilisha mradi.

MWISHO