POLISI BUKOMBE YAADHIMISHA MIAKA 60 YA JESHI LA POLISI TANZANIA KWA KUTOA MSAADA KATIKA HOSPITALI YA WILAYA

Imewekwa: September 9th, 2024

Jeshi la Polisi Wilaya ya Bukombe limeadhimisha miaka 60 ya Jeshi la Polisi Tanzania kwa kutoa msaada wa vitu mbalimbali kama vile Sabuni, Mafuta na sukari katika wodi ya wazazi na watoto wachanga Hospitali ya Wilaya ya Bukombe.

Maadhimisho hayo yamefanyika leo tarehe 09 Septemba, 2024 yakiongozwa na Katibu Tawala wa Wilaya ya Bukombe Ndg. Ally Mketo ambapo amelipongeza jeshi la polisi kwa kuendelea kuwalinda wananchi wake vyema na kuwakumbuka wenye uhitaji.

“Hongereni sana Jeshi la polisi kwa kuigusa jamii kwani mmefanya jambo jema na mtakumbukwa daima na wazazi hawa”.

Akizungumza katika wodi ya wazazi Mkuu wa Jeshi la Polisi Wilaya ya Bukombe OCD Haruni Kasubi amesema katika kuadhimisha sherehe hiyo wameamua kutoa msaada huo kama njia ya kurudisha fadhila katika jamii.

Naye Mganga mkuu wa Wilaya ya Bukombe Dkt. Deograsia Mkapa ameshukuru jeshi la polisi kwa kuwatembelea na kuwafariji wagonjwa hao na kuwataka waendelee na moyo huo  kwani umeleta faraja kwa wagonjwa. 

Sherehe za Maadhimisho hayo zimehitimishwa katika viwanja vya stendi ya mabasi Ushirombo ambapo wananchi wamesisitizwa kutoa ushirikiano kwa jeshi la polisi ili kuweza kuwabaini wahalifu na kuifanya Bukombe iwe salama zaidi.

“Huduma Bora za Polisi kwa Jamii zitapatikana kwa kubadilika kifikra, Usimamizi wa Sheria na Matumizi ya Tehama.”