Pongezi za Dhati Kwa Ufaulu wa Kibabe Kidato cha Sita - DED Lutengano

Imewekwa: July 21st, 2023

Mkurugenzi Mtendaji wa Halmashauri ya Wilaya ya Bukombe Lutengano Mwalwiba amewapongeza walimu, wanafunzi, wazazi pamoja na wadau wa elimu kwa matokeo mazuri ya kidato cha sita 2023.

"Hakuna daraja la nne wala sifuri, nadhani sasa naeleweka ninapoita haya ni matokeo ya kibabe  na yaliyotuheshimisha sana Bukombe.

Ninawezaje kukaa kimya kwa jambo kubwa namna hii??

Nawezaje kuvifanya vya kawaida vitu visivyo vya kawaida??

kunyamaza kwa kazi hii adhimu iliyofanywa na Walimu wetu wema wenye mioyo ya Dhahabu?"

Pongezi hizo amezitoa tarehe 20 July, 2023 wakati akitoa shukrani zake za dhati kwa walimu wa shule ya sekondari Runzewe na Bukombe.

Aidha aliendelea kusema kuwa "Maneno yangu hayawezi kuzidi thamani ya neno Ahsanteni sana. Kwenye Dunia ya leo maneno hayana nafasi bali MATOKEO kelele yake haiwezi kuzuiwa. Tumeamua na tumedhamiria, Bukombe hakuna wa kutuzuia wala hakuna wa kutusimamisha. Tumeamua kuwa Shamba darasa la utekelezaji wa Ilani ya Chama Cha Mapinduzi."

Mkuu wa shule ya sekondari Runzewe Renatus Halili amesema nidhamu nzuri  ya wanafunzi ni moja ya sababu iliyopelekea wanafunzi wake kufanya vizuri.

"Tumekuwa tukifanya vizuri ila kwa mwaka huu tumefanya vizuri sana sababu kubwa ni nidhamu waliyokuwanayo wanafunzi."

Halmashauri ya Wilaya ya Bukombe ilikuwa na shule mbili zenye watahiniwa waliofanya mtihani wa Taifa wa kidato cha sita kwa mwaka 2023 na kurokodi matokeo yenye ufaulu wa daraja la kwanza mpaka la tatu.

# BUKOMBE HAKUNA KILICHOSIMAMA