TENGENI FEDHA ZA UKARABATI WA OFISI-DC MURAGILI

Imewekwa: August 23rd, 2024

Mkuu wa Wilaya ya Bukombe Mhe. Mhandisi Paskasi Muragili ametoa wito kwa Wakuu wa Taasisi za Serikali Wilaya ya Bukombe kuhakikisha wanatenga fedha za ukarabati wa Majengo ya Serikali ili kuyaongezea uhai.

“ Tuyathamini na kuyalinda Majengo ya Serikali kwa kuyakarabati ili yadumu kwa muda mrefu”.

Wito huo ameutoa tarehe 22 Agosti, 2024 wakati wa Ufunguzi wa Jengo lililokarabatiwa la Wakala wa Majisafi na Usafi wa Mazingira Vijijini (RUWASA) kwa fedha zilizotoka Serikali Kuu, kiasi cha Shilingi 17,950,000/=.

Aidha Muragili aliendelea kusema kuwa uwepo wa Majengo Mazuri kwa Watumishi wa Umma ni sehemu ya motisha kwa watumishi wetu kwani watapata nafasi ya kufanya kazi katika mazingira yaliyo salama , yenye hadhi na yanayovutia. Hali hii itatupa msukumo wa kuongeza ufanisi wetu na kutoa huduma bora kwa wananchi wa Bukombe.

Akiongea wakati wa Ufunguzi huo Meneja wa RUWASA Wilaya ya Bukombe Mhandisi James Benny amesema Ukarabati huo umehusisha Uwekaji wa madirisha ya kisasa ya grill na aluminium badala ya yale ya zamani, Ukarabati wa Milango, Ukarabati wa vyoo vilivyokuwa havitumiki na sasa viko katika hali bora kabisa , Kuboresha mifumo ya maji na umeme ili kuhakikisha huduma hizi zinapatikana kwa uhakika, Upakaji upya wa rangi na Ujenzi wa stoo ya vifaa.

Hafla hiyo ilihudhuriwa na Kamati ya Ulinzi ua Wilaya, Wakuu wa Idara na Vitengo wa Halmashauri, Wakuu wa Taasisi mbalimbali za Umma pamoja na watumishi wengine.