Tuwapeleke Watoto Katika Nyumba za Ibada

Imewekwa: June 15th, 2023

Afisa Tawala  Ndg. Ally Mketo kwa niaba ya Mkuu wa Wilaya ya Bukombe amewataka wazazi na walezi kuhakikishwa wanawapeleka watoto kwenye nyumba za Ibada.

"Tuwapeleke watoto wetu kwenye nyumba za Ibada ili  waweze kuwa na maadili mema na kuachana na makundi ovu.

Mketo ameyasema hayo tarehe 14 Juni, 2023 wakati wa Madhimisho ya Siku ya Mtoto wa Afrika ambayo kiwilaya yamefanyika katika viwanja vya Kapela kata ya Igulwa yenye kauli mbiu "Zingatia Usalama wa Mtoto katika Ulimwengu wa Kidijitali."

Aidha amewataka walezi pamoja na wazazi kuhakikisha wanaacha tabia ya ubaguzi wa kijinsi kwani watoto wote wana haki sawa ya kupata elimu.

" Tunataka watoto wote wapate elimu bila kuwasahau watoto wenye ulemavu kwani elimu ndiyo mkombozi wa mtoto wa Kitanzania na Afrika kwa ujumla."

Kwa upande wake Mkuu wa Divisheni ya Maendeleo ya Jamii Rita Kamenya amesema Halmashauri ya Wilaya Bukombe kwa kushirikiana wadau mbalimbali ili kumlinda mtoto  dhidi ya ukatili wametoa elimu  kwa jamii  kuhusu haki na maendeleo ya mtoto katika Kata za Runzewe Mashariki, Runzewe Magharibi, Katome, Ushirombo, katente, Igulwa, Bukombe, Lyambamgongo, Busonzo, Uyovu, na Iyogelo.

Naye Afisa Lishe wa Wilaya Lissa Mwakyusa amewataka wazazi kuhakikisha wanazingatia lishe bora na yenye virutubisho muhimu hasa katika siku 1000 za awali za makuzi ya  watoto ili kutoyumbisha hatua za ukuaji.

Katika sherehe za Maadhimisho hayo watoto walipata fursa ya kushiriki katika michezo mbalimbali na kuzawadiwa zawadi kama vile madaftari, kalamu na Mipira.