TWENDENI TUKAFANYE MAGEUZI MAKUBWA KWENYE SEKTA YA KILIMO - DC MURAGILI

Imewekwa: August 23rd, 2024

Mkuu wa Wilaya ya Bukombe Mhe.Paskasi Muragili amewataka maafisa ugani wa Halmashauri ya Wilaya ya Bukombe kuhakikisha wanafanya mageuzi makubwa kwenye sekta ya kilimo ili kumuunga mkono Mhe.Rais.

"Tumepatiwa vitendea kazi likiwemo gari, Pikipiki, Vifaa vya kupimia udongo, Vishikwambi pamoja na mavazi rasmi ili tuweze kutatua changamoto zinazowakabili wakulima."

Muragiri ameyasema hayo tarehe 23 Agosti, 2024 wakati wa hafla fupi ya kukabidhi vitendea kazi kwa Maafisa ugani likiwemo gari la ufuatiliaji kwa ajili ya kuboresha utendaji kazi kwenye sekta ya kilimo pamoja na kukabidhi  gari  la Tume ya Utumishi wa Walimu (TSC).

Akiongea katika hafla hiyo Mkuu wa Divisheni ya Kilimo, Mifugo na Uvuvi Zedekiah Solomoni Osano amesema Wilaya ya Bukombe tunakwenda kutatua changamoto zote zilizokuwa zinawakabili wakulima na kuhakikisha wanalima kisasa na kwa gharama nafuu kwani vitendea kazi vyote tunavyo.

Aidha Muragili amewataka TSC kuhakikisha wanasimamia nidhamu na maadili ya Walimu kwa kuwatendea haki ili kuleta maendeleo kwenye sekta ya elimu nchini.

"Kwenye sekta ya elimu tunaamini mtafanya kazi vizuri kwa kumsikiliza kila mwalimu na kumtendea haki kwasababu tunauwezo wa kuwafikia mahali popote".

Kwa upande wake Katibu wa Msaidizi TSC Wilaya Mw.l Francis Sungura amemuahidi Mkuu wa Wilaya kuwa gari hilo litatumika kwa malengo yaliyokusudiwa kwa kuhakikisha walimu wanafikiwa huko huko waliko na kutatuliwa kero zao.