VIJANA WATAKIWA KUWA WAZALENDO WA TAIFA LAO - OTHMAN HIJA.

Imewekwa: October 23rd, 2024

Katibu Mkuu wa Taasisi ya Uzalendo Wetu Taifa letu Bw. Othman Hija Hamadi  amewataka vijana wa Halmashauri ya Wilaya ya Bukombe kuwa wazalendo katika kulitumikia Taifa lao.

"Mkiishi maisha ya Kizalendo mtakuwa mstari wa mbele katika kupambana na mambo maovu katika jamii."

Othman ameyasema hayo tarehe 22 Oktoba , 2024 wakati akiongea na wanafunzi wa shule ya sekondari, Bulangwa, Bukombe, Said Nkumba na Shule ya Msingi Ilyamchele wakati wa ziara yake ya kutembelea utekelezaji wa miradi ya maendeleo  inayotekelezwa Wilayani Bukombe katika kipindi cha miaka mitatu cha uongozi  wa awamu ya sita ya Rais wa Jamhuri ya Muungano wa Tanzania.

Aidha ameupongeza uongozi wa Wilaya ya Bukombe kwa utekelezaji mzuri wa miradi ya maendeleo.

"Hongereni sana kwa usimamizi mzuri wa miradi kwani imetekelezwa kwa ubora ambao serikali imekusudia."

Aidha amewataka watoa huduma za afya  kuhakikisha wanatoa huduma nzuri kwa wananchi kwani serikali imejenga majengo mazuri pamoja na kuleta vifaa tiba.

Kwa upande wake Naibu Katibu Mkuu wa Taasisi ya Uzalendo wetu Taifa Letu Zanzibar  Abeid Juma Abed amewaasa wanafunzi kusoma kwa bidii na  kuhakikisha wanatunza na kuilinda miundombinu ya shule ili iweze kudumu kwa muda mrefu.

"Serikali imewajengea madarasa ya kisasa hakikisheni mnayatunza ili yaweze kutumika hadi vizazi vijavyo.

Katika ziara hiyo miradi iliyotembelewa ni pamoja na Mradi wa Maji Bulangwa na Namonge, Ukarabati wa Hospitali ya Wilaya ya Bukombe, ujenzi wa barabara kiwango cha rami Uyovu, Ujenzi wa kituo cha afya Msonga pamoja na miradi ya elimu msingi na sekondari.