VITUO VILIVYOKAMILIKA VYATAKIWA VIANZE KUTOA HUDUMA KWA WANANCHI

Imewekwa: April 15th, 2024

Mwenyekiti wa Bodi ya Afya ya Halmashauri Bw.Kelvin Makonda ameitaka Timu ya Usimamizi na Uendeshaji wa Huduma za Afya ngazi ya Halmashauri (CHMT)

kuhakikisha Zahanati 7 zilizo katika hatua ya ukamilishaji zinakamilika na kuanza kutoa huduma  bora kwa wananchi.

Makonda ameyasema hayo tarehe 15 April, 2024 wakati wa kupitia na kujadili taarifa ya utekelezaji ya robo ya tatu kwa kipindi cha Mwezi  Januari - Machi kwa mwaka wa fedha 2023/2024.

Kwa upande wake Diwani wa Kata ya Bulega Mhe.Erick Emily Kagoma ambaye ni Mwenyekiti wa Kamati ya huduma za Jamii amesema vituo hivyo vikikamilika vitawapunguzia adha wananchi ya kutembea umbali mrefu kwa ajili ya kupata huduma ya afya.

Akiongea kwa niaba ya Mganga Mkuu wa Wilaya ya Bukombe Dr.Mahona Kaji amesema jumla ya miradi ya afya 42 imeendelea kutekelezwa na ipo katika hatua mbalimbali za ujenzi na imeshirikisha nguvu za wananchi  sambamba na fedha kutoka kwa wadau na Serikalini.

Mpaka sasa Idara ya Afya kwa kushirikiana na Ofisi ya Mkurugenzi Mtendaji wa Halmashauri ya Wilaya ya Bukombe imeishapeleka maombi ya kusajiri vituo 5 ili vianze kutoa huduma kuanzia mwezi Julai 2024. Vituo hivyo ni Zahanati ya kijiji cha Namsega, Nalusunguti, Ishololo, Bwenda (Katente) na Bwenda (Namonge).