WAJUMBE WA KAMATI YA HUDUMA ZA MIKOPO YA KATA WATAKIWA KUTENDA HAKI

Imewekwa: October 9th, 2024

Mkuu wa Wilaya ya Bukombe Mhe.Paskasi Muragili amewataka wajumbe wa kamati ya huduma ya Mikopo ya Kata kuhakikisha watenda haki wakati wa uidhinishaji wa mikopo kwa vikundi vya Wanawake, Vijana na Watu Wenye ulemavu.

"Mtakapokuwa waaminifu, waaadilifu na watenda haki tunaamini hakutotokea  malalamiko yoyote wakati wa zoezi zima la utoaji mikopo na urejeshaji."

Muragili ameyasema hayo tarehe 09 Oktoba, 2024 wakati wa mafunzo ya wajumbe wa kamati ya Mikopo ya Kata ya kuimarisha uelewa juu ya kanuni na mwongozo mpya za utoaji wa mikopo ya asilimia 10 ya mapato ya ndani ya halmashauri.

Aidha amewataka wajumbe hao kufanya kazi kwa bidii ili zoezi liweze kuwa na mafanikio makubwa kwa  kufuata kanuni  za mwongozo mpya ambao unatatua changamoto zote za awali.

Akiongea wakati wa kikao hicho kaimu Mkurugenzi Mtendaji wa Halmashauri Melania Kwai ambaye ndiye Mkuu wa Divisheni ya Maendeleo ya Jamii alisema, wajumbe wa kamati ya huduma ya Mikopo ngazi ya kata ni Watendaji wa Kata, Maafisa Maendeleo ya Jamii Kata, Maafisa Ustawi wa Jamii Kata, Maafisa Ugani wa Kata, Maafisa Elimu Kata, Watendaji wa Vijiji na Polisi Kata na jukumu lao la Msingi nikuhakikisha uwazi, ufanisi na uwajibikaji katika mchakato wa utoaji mikopo.

Kwa upande wake Mtendaji wa Kata ya Uyovu  Marco Nsolo akiongea kwa niaba ya washiriki wa mafunzo, ameishukuru serikali kwa kuwezesha mafunzo hayo kwani wataweza kufanya tathmini ya awali ya maombi ya mikopo yaliyowasilishwa, kutembelea vikundi vilivyoomba mikopo,  kuaanda taarifa ya hali halisi ya vikundi na kuwasilisha katika kamati ya mikopo ya halmashauri.

Sambamba na mafunzo hayo washiriki walikula kiapo cha kuepuka mgongano wa maslahi

Kwa mwaka wa fedha 2024/2025 serikali ilitangaza kurudisha mikopo ya asilimia 10 kwa kanuni na miongozo mipya ziitwazo Kanuni za Utoaji na Usimamizi wa Mikopo kwa Vikundi vya Wanawake, Vijana na Watu Wenye Ulemavu za mwaka 2024 kwa ajili ya kutatua changamoto za nyuma zilikuwa zimejitokeza.