Wananchi 51, 880 Kunufaika na Miradi ya Maji Bukombe

Imewekwa: July 5th, 2022

Jumla ya wananchi 51,880 katika vijiji 11 mbioni kunufaika na miradi 8 ya Maji yenye thamani ya kiasi cha shilingi Bilioni 4.1 sawa na asilimia 108 ya Bajeti ya mwaka 2021/2022 inayoendelea kutekelezwa wilayani Bukombe.

Yamebainishwa hayo tarehe Julai 05, 2022 na Kaimu Meneja wa Wakala wa Maji na Usafi wa Mazingira vijijini (RUWASA) Jemas Benny wakati wa ziara ya  kutembelea na kukagua miradi ya maji iliyopokea fedha kupitia programu ya Malipo kulingana na Matokeo pamoja na Mpango wa Maendeleo kwa Ustawi wa Taifa na Mapambano dhidi ya Uviko - 19.

"Tumejipanga kusimamia miradi ya maji na kuhakikisha inakamilika kwa muda uliopangwa hali ambayo itawasaidia wananchi kupata huduma za maji safi na salama katika maeneo wanayoishi." Benny amefafanua.

Aidha, ametoa wito kwa wananchi kuhakikisha wanaitunza na kuilinda miundombinu hiyo ili huduma ya maji safi na salama iwe endelevu.

"Wananchi wenzangu tuhakikishe tunatunza miundombinu ya maji inayojengwa vilevile kutunza vyanzo vya maji kwa kutokufanya shughuli zozote za kibinadamu ndani ya mita 60 ya vyanzo hivyo," amesema Benny.

Naye, Vumilia John mkaazi wa kijiji cha Bugelenga ameishukuru serikali kupitia Wakala wa Maji na Usafi wa Mazingira Vijijini (RUWASA) kwa kuwasogezea  huduma ya maji katika maeneo yao.

"Tunaishukuru sana serikali kwa kutuletea huduma ya maji safi  kwani hapo nyuma tulikua tukitumia maji ambayo siyo safi na salama lakini kupitia miradi hii naamini tutatumia maji yaliyo safi na salama."

Miradi yote ya maji inayotekelezwa katika halmashauri ya Wilaya ya Bukombe inahusisha ujenzi wa 'Power House', uunganishaji wa umeme wa gridi na ufungaji wa pampu ya kusukuma maji, ujenzi wa Matanki pamoja na ujenzi wa vituo 57 vya kuchotea maji.

Vijiji vinavyonufaika na miradi hiyo ya maji ni pamoja na kijiji cha Bugelenga, Katome, Ihako, Namsega, Msangila, Kazilamyaye, Namonge, Nasiluluma, Kanebwa na mtaa wa Butambala.