Wananchi wa Kijiji cha Shibingo, Bulangwa, Ikalanga, kiziba na Nasiluluma watakiwa kushiriki utekelezaji wa Miradi ya Ujenzi.

Imewekwa: April 11th, 2022

Katibu Tawala wa Wilaya ya Bukombe Paul Cheyo amewataka wananchi wa kijiji cha Shibingo, Bulangwa, Ikalanga, kiziba na Nasiluluma kuhakikisha  wanashiriki katika utekelezaji wa miradi ya  ujenzi ya kuondoa umaskini kupitia mpango wa TASAF.

"Miradi yetu ili iweze kuleta tija  inategemea  ushiriki wetu sisi wananchi katika  kujitolea nguvu zetu kama vile kuchimba msingi, kuchota maji, kusogeza mawe na hata mchanga.

"Hayo ameyasema tarehe 9 April, 2022 kwa niaba ya Mkuu wa Wilaya ya Bukombe Mhe.Said Nkumba wakati wa zoezi la uzinduzi wa  miradi hiyo.

Vile vile Cheyo amezitaka kamati za usimamizi wa mradi  (CMC)  kuhakikisha wanasimamia mradi kwa umakini mkubwa na kwa viwango ambavyo serikali inatarajia.

Naye Mratibu wa TASAF Prisca Lyimo amesema Halmashauri ya Wilaya ya Bukombe ilipokea kiasi cha  shilingi Milioni 422 kwa ajili ya utekelezaji wa ujenzi wa vyumba viwili vya madarasa ofisi moja ya walimu na matundu sita ya vyoo kwa kila shule katika shule ya msingi Ikalanga, Bulangwa na shibingo. 

Na Ujenzi wa Zahanati, matundu manne ya vyoo na kichomea Taka kwa kila kijiji katika kijiji cha Nasiluluma na kiziba.

Kwa upande wake Neema kiziba Athumani mwananchi wa kijiji cha  kiziba ameishukuru serikali kwa kuwasogezea huduma ya afya karibu kwani walikuwa wanatembea umbali mrefu kwenda kupata huduma hiyo katika kituo cha Afya Ushirombo.

Naye Diwani wa Kata ya Bulangwa ambaye ni Mwenyekiti wa Halmashauri ya Wilaya ya Bukombe Mhe. Yusuph Mohamed Yusuph amesema wananchi wa kata yake wameupokea mradi na wameahidi kuutekeleza.

"Sisi wananchi wa Kata ya Bulangwa tupo tayari kushirikiana na serikali kwa ajili ya kutekeleza mradi kwani mradi huu utasaidia kupunguza msongamano wa wanafunzi madarasani katika kata yetu."

Miradi ya ujenzi ya kuondoa umaskini katika Halmashauri ya Wilaya ya Bukombe kupitia mpango wa TASAF III awamu ya pili inatekelezwa chini ya ufadhili wa Jumuiya ya nchi zinazozalisha Mafuta Duniani (OPEC).

MWISHO