WANAWAKE WACHIMBAJI BUKOMBE WAHIMIZWA KUENDELEZA UMOJA NA MSHIKAMANO

Imewekwa: February 11th, 2025

Mkuu wa Wilaya ya Bukombe Mhe. Paskasi Muragili amewataka Wanawake Wachimbaji Bukombe (WAWABU) kuendeleza umoja na mshikamano ili waweze kujikwamua kiuchumi.

Muragili ameyasema hayo wakati akizungumza na wanawake hao katika Mkutano Mkuu wa Wanawake Wachimbaji Bukombe uliofanyika tarehe 11 Februari, 2025 katika ukumbi wa CCM Bukombe.

“Hongereni sana kwa kuchangamkia fursa na kuanzisha umoja huu kwani mtakwenda kutengeneza ajira na kuinua uchumi wa familia na wananchi kwa ujumla”.

Aidha Muragili amemshukuru Rais Samia Suluhu Hassan kwa kutoa idhini ya kumega sehemu ya hifadhi ya kigosi ili itumike kwa shughuli za uchimbaji wa madini.

Naye Mkuu wa Idara ya Maendeleo ya Jamii Bi. Melania Kwai amewataka WAWABU kushiriki kikamilifu katika shughuli za kiuchumi bila kusahau malezi katika familia ili kuepuka vitendo vya ukatili wa kijinsia.

Kwa upande wake Mwenyekiti wa kikundi cha WAWABU Regina Robert amesema kuwa kikundi hicho kina jumla ya wanachama 372 na wameweza kumiliki Vitalu 13 huku akisisitiza kuwa lengo la mkutano huo ni kutathmini walipotoka, wanapoenda na nini wafanye ili wazidi kuimarika kiuchumi.