Watumishi Wapewa Elimu Kuhusu Mfumo wa Anwani za Makazi

Imewekwa: February 21st, 2022

Watumishi ngazi ya Kata katika Halmashauri ya Wilaya ya Bukombe wamepata elimu kuhusu mfumo wa Anwani za Makazi lengo likiwa ni kupata uelewa wa pamoja kuhusu umuhimu na namna ya kutekeleza mfumo huo.

Akifungua mafunzo hayo leo tarehe 21 februari, 2022 yaliyoshirikisha kada mbalimbali katika ngazi ya kata Mkurugenzi Mtendaji wa Halmashauri ya Wilaya ya Bukombe Lutengano Mwalwiba amewataka watendaji hao kujituma usiku na mchana ili kazi hiyo iweze kufikia malengo ya serikali kwa wakati.

Aidha amewataka watambue kuwa zoezi hili ni zoezi muhimu na la kitaifa.

"Hili ni zoezi muhimu na ni la kitaifa, hakikisheni taarifa zitakazokusanywa ziwe ni taarifa sahihi ili ziweze kuleta tija na kuonesha mwelekeo na matarajio ya serikali."

Akiongea katika mafunzo hayo Afisa TEHAMA Justina Haule amesema manufaa ya mfumo wa Anwani za Mkazi ni kuwezesha kufanyika kwa biashara Mtandao, kuboresha upataji, utoaji na upelekaji wa huduma na bidhaa hadi mahali stahiki, kuimarisha ulinzi na usalama, kuongeza ajira na kurahisisha shughuli za tafiti na upatikanaji wa taarifa.

Naye Mtendaji wa Kata ya Bukombe Marco Nsoro kwa niaba ya watumishi ngazi ya kata amemshukuru Mkurugenzi Mtendaji kwa kuwapatia mafunzo hayo. Aidha amemuhakikishia Mkurugenzi Mtendaji kuwa watafanya kazi hiyo kwa ufasaha na kwa kuzigatia mwongozo uliotolewa na serikali.

Mafunzo ya Anwani za Makazi nchini unatekelezwa na Wizara ya Habari Mawasiliano na Teknolojia ya Habari kwa kushirikiana na Ofisi ya Rais Tawala za Mikoa na Serikali za Mitaa na Wizara ya Ardhi, Nyumba na Maendeleo ya Makazi.

Imetolewa na:-                                       

Kitengo cha TEHAMA

Halmashauri ya Wilaya ya Bukombe

Tarehe 21 Februari, 2022