ZAIDI YA WAGONJWA 400 WAMEHUDUMIWA NA MADAKTARI BINGWA NA BOBEZI WA RAIS SAMIA

Imewekwa: June 28th, 2024

Wagonjwa zaidi ya 400 wamepatiwa matibabu kupitia kambia ya madaktari bingwa na ubingwa bobezi wa Rais Samia katika Hospitali ya Wilaya ya Bukombe.

Hayo yamebainishwa na Mkuu wa Wilaya ya Bukombe Mhe. Paskasi Muragili tarehe 28 Juni, 2024 wakati wa hafla ya kuhitimisha Kambi ya Matibabu ya Madaktari bingwa na ubingwa bobezi wa Rais Samia.

Mhe. Muragili amesema kuwa ujio wa madaktari hao umepunguza gharama za matibabu na wagonjwa kusafiri umbali mrefu kufuata huduma za rufaa nje ya Wilaya.

“Ujio wa madaktari hawa umeokoa maisha ya wagonjwa wengi ambao wangeenda nje ya Wilaya na Mkoa kufuata huduma za kibingwa”.

Aidha Muragili amemshukuru Rais Samia kwa kuwaleta madaktari bingwa kwani ujio huo umeongeza ujuzi kwa madaktari wenyeji na wataendelea kutoa huduma bora zaidi.

Kwa upande wake Mkurugenzi Mtendaji wa Halmashauri ya Wilaya ya Bukombe Ndg. Lutengano Mwalwiba amesema kuwa katika bajeti ya mwaka huu wa fedha wametenga fedha kwa ajili ya kuwawezesha madaktari wawili ili waweze kusoma masomo ya kibingwa.

Naye Kaimu Mganga Mkuu wa Wilaya ya Bukombe Dkt. Mahona Kaji amesema kuwa ujio wa madaktari bingwa umekuwa fursa kwa madaktari wenyeji na ameomba zoezi hilo liwe endelevu na waweze kupata madaktari zaidi.

Kwa upande wake daktari bingwa na bobezi wa magonjwa ya wanawake na Afya ya uzazi Dkt. Philemon Magile amesema kuwa lengo la ujio wao ni kufanya matibabu ya kibingwa kwa wagonjwa ngazi ya Wilaya na wamefanikiwa kufanya upasuaji kwa wagonjwa tisa.

Kambi ya madaktari bingwa na bobezi wa Rais Samia katika Halmashauri ya Wilaya ya Bukombe imefanyika kwa siku tano kuanzia tarehe 24 Juni, 2024 kuhitimishwa tarehe 28 Juni, 2024.