DC Nkumba atoa pongezi kwa NHIF

Imewekwa: August 30th, 2020

Mkuu wa Wilaya ya Bukombe Mhe. Said Nkumba kwa niaba ya Mkuu wa Mkoa wa Geita ametoa pongezi kwa Mfuko wa Taifa wa Bima ya Afya (NHIF) kwa kubuni namna mbalimbali za kuongeza wanachama wapya. 

“Hongera sana NHIF kwa kuongeza wanachama wapya wa mfuko wa Bima ya Afya  walio katika ushirika wa mazao ya kimkakati”

Pongezi hizo amezitoa tarehe 28 Agosti,2020 wakati akikabidhi kadi za Bima ya Afya 78 kwa wanachama wapya waliojiunga na Bima ya Afya kupitia mpango wa Ushirika Afya kutoka katika vyama vya Ushirika (AMCOS) ambavyo ni Nyamagana, Nasiluluma na Msangila Wilayani Bukombe.

Aidha amewapongeza wanaushirika wa vyama vya msingi kwa kutambua umuhimu wa kujiunga na mfuko huo.

“Hongereni wanaushirika wa vyama vya msingi vya Nasiluluma, Nyamagana na Msangila kwa kutambua umuhimu wa kuwa na Bima ya Afya”

Pia amewataka wanachama wapya kutumia kadi za Bima ya Afya kwa walengwa waliokusudiwa tu na kuacha tabia ya kuazimisha kwa watu wengine kwani kufanya hiyo watakuwa wametenda kosa la jinai.

Meneja wa NHIF Mkoa wa Geita  Elias Odhiambo amesema mpango wa Bima ya Afya kwa wakulima ni mpango ambao uliandaliwa na serikali baada ya kubaini kwamba wakulima ambao ndiyo uti wa mgongo wanchi hii hawana mpango maalumu wa kuwawezesha kupata huduma za afya.

Nae Maziku Swaku Ibaga Mwenyekiti wa Chama cha Msingi Nasiluluma amewataka wanaushirika ambao hawajajiunge wajiunge  ili waweze kumudu gharama za matibabu kwa kuchangia kabla ya kuugua kwani kiwango cha uchangiaji katika mfuko wa Ushirika Afya ni kiasi cha shilingi 76,800 kwa mtu moja kwa mwaka.

Mkuu wa Wilaya ya Bukombe Mhe. Said Nkumba  akitoa kadi ya Bima ya Afya kwa mwanachama mpya.

Meneja wa NHIF Mkoa wa Geita Elias Odhiambo akiieleza namna ya kujiunga na mpango wa Ushirika afya wakati wa hafla ya kukabidhi kadi.

Baadhi ya wanaushirika wakiwa kwenye hafla ya kukabidhiwa kadi.

Baadhi ya viongozi na wanaushirika wakiwa kwenye picha ya pamoja na Mkuu wa Wilaya ya Bukombe Mhe. Said Nkumba.