NMB Bukombe yachangia mabati 185 na kompyuta 7

Imewekwa: January 30th, 2019

NMB Bukombe imekabidhi mabati 185 yenye  thamani ya shilingi Million 5 kwa shule ya sekondari Ushirombo na kompyuta saba kwa shule ya sekondari Katente tarehe 29 Januari, 2019 ikiwa ni kuhakikisha jamii inafaidika kutokana na faida inayopatikana kutoka kwa wateja wanaotumia benki hiyo.

Akizungumza katika makabidhiano hayo Mkuu wa Wilaya ya Bukombe Mhe. Said Nkumba ameishukuru NMB  kwa ufadhili walioutoa kwa shule hizo mbili. Pia amemuagiza Mkurugenzi Mtendaji wa Halmashauri ya Wilaya ya Bukombe kuhakikisha anasimamia ukamilishaji wa miundombinu hiyo ili ifikapo mwishoni mwa mwezi wa pili mwaka 2019 wanafunzi waweze kuyatumia madarasa hayo.

Aidha Meneja wa NMB Kahama Ndg. Richard Kirenga kwa niaba ya Menaja wa NMB Kanda ya Magharibi alitoa shukrani zake kwa uongozi wa Wilaya ya Bukombe  pamoja na uongozi wa shule ya sekodari Ushirombo na Katente kwa kuwa mstari wa mbele kuhakikisha shule hizi zinapata madarasa bora pamoja na vifaa vya KITEHAMA kwa ajili ya ufundishaji na ujifunzaji ili kuimarisha elimu na kuwa mfano bora hapa nchini.

Ndg. Richard aliendelea kusema “katika kuhakikisha tunachangia maendeleo kwa wananchi NMB kwa mwaka 2019 imetenga zaidi ya shilling bilioni 1 kwa ajili ya sekta ya afya na elimu kwani vifaa vya afya na elimu vimekuwa ni changamoto kubwa hapa nchi”.

Naye Meneja wa NMB Bukombe Ndg George Fundi alisema “sisi kama NMB tulipopata maombi yenu tulifarijika na kuamua mara moja kuja kushirikiana na ninyi na kuwa chachu ya maendeleo kwani kupitia jamii NMB imekukuwa benki kubwa kuliko benki yoyote hapa nchini”.

Aidha Diwana wa kata ya Bulagwa  Mhe. Yusuph Mohamed ameahidi kuhakikisha wanaezeka majengo hayo mapema iwezekanavyo ili wanafunzi waweze kutumia miundombinu hiyo inayojengwa kwa kutumia nguvu za wananchi pamoja na fedha za mradi wa P4R (lipa kulingana na matokeo) shillinig milioni 8 zilizobaki baada ya mradi huo kukamilika.

Akihitimisha hafla hiyo Mkurugenzi Mtendaji wa Halmashauri ya Wilaya ya Bukombe Ndg. Dionis Muyinga aliwaomba wazazi kuhakikisha wanashiriki katika kuchangia shughuli za maendeleo ili Benki ya NMB iendelee kuunga mkono shughuli za serikali. ”NMB imeonyesha njia sie tunatakiwa tutangulie mbele zaidi ili wao waendelee kutuunga mkono”.

Mkuu wa Wilaya ya Bukombe Mhe. Said Nkumba akiongea wakati wa hafla  ya kukabidhi mabati na kompyuta

Mkuu wa Wilaya ya Bukombe Mhe. Said Nkumba akikabidhiwa  kompyuta na uongozi wa NMB

Meneja wa Banki ya NMB Kahama Ndg. Richard Kirenga kwa niaba ya Menaja wa Benki Kanda ya Magharibi akizungumza mbele ya wageni waalikwa

Vyumba 3 vya madarasa na ofisi 1 ya walimu  Vitakavyopauliwa kwa mabati yaliyotolewa na Benki ya NMB katika shule ya sekondari Ushirombo