historia ya bukombe

Halmashauri ya Wilaya ya Bukombe ni moja kati ya Halmashauri tano (05) zinazounda  Mkoa wa Geita, ina ukubwa wa eneo la kilometa za mraba 8,055.59.

Halmashauri hii Ilianzishwa Julai mwaka 1995 kwa tangazo la serikali Na.205 la mwaka 1998 ambapo  Baraza la Halmashauri ya Wilaya liliundwa rasmi mwaka 2000 baada ya uchaguzi Mkuu wa Rais, Wabunge na Madiwani.

Kwa upande wa Mashariki na Kaskazini Wilaya ya Bukombe inapakana na Wilaya ya Mbogwe,Kaskazini Magharibi inapakana na Wilaya ya Chato, upande wa Magharibi inapakana na wilaya ya Biharamulo, na kwa upande wa kusini inapakana na Wilaya ya Urambo.

Halmashauri ya Wilaya ya Bukombe ina tarafa 3 ambazo ni Ushirombo,Siloka, na Bukombe. Ina kata kumi na saba (17) ambazo ni Iyogelo, Busonzo, Bukombe, Butinzya,Bulega, Runzewe Mashariki, Runzewe Magharibi, Namonge, Katente, Igulwa,Bulangwa, Ushirombo, Uyovu, Bugelenga, Lyambamgongo, Katome, na Ng’anzo.

Halmashauri ya Wilaya ya Bukombe ina vijiji sitini na nne (64), na vitongoji mia tatu arobaini na nane (348).  Pia wilaya ina jimbo moja la uchaguzi ambalo Mbunge wake ni kutoka chama cha Mapinduzi (CCM) mhe.Dotto Biteko ambaye ni Naibu Waziri Mkuu na Waziri wa Nishati.

Kwa mujibu wa sense ya watu na makazi ya Mwaka 2022, Halmashauri ya Wilaya ya Bukombe ina jumla ya wakazi 407,102 ambapo kati yao wanawake ni 207,187 na wanaume ni 199,915.

Wilaya ya Bukombe imezungukwa na msitu kwa asilimia 76 huku asilimia 24 ya eneo lote la wilaya linafaa kwa Kilimo, Ufugaji na makazi.

Shughuli za uchumi katika wilaya hii ni Kilimo na ufugaji ambazo zinachukua asilimia 84 ya Mapato ya wakazi wote wa wilaya na asilimia 16 inahusisha shughuli za uchimbaji wa madini, biashara, ufugaji nyuki na wafanyakazi.

KARIBU WILAYA YA BUKOMBE UJIFUNZE UFUGAJI WA NG'OMBE,NYUKI NA AINA MBALIMBALI ZA KILIMO CHA BIASHARA.