BILIONI 22 KUJENGA SOKO NA STENDI USHIROMBO-KATIMBA

Imewekwa: July 31st, 2024

Naibu Waziri Ofisi ya Rais TAMISEMI Mhe. Zainab Katimba amesema serikali imetenga shilingi bilioni 22 kwaajili ya ujenzi wa soko na stendi ya mabasi ya kisasa katika eneo la Ushirombo Halmashauri ya Wilaya ya Bukombe , mkoani Geita.

Kati ya fedha hizo, Sh bilioni 15.89 zitatumika katika ujenzi wa soko la kisasa na Sh bilioni 6.29 zitatumika kwaajili ya ujenzi wa stendi ambapo Serikali imetoa Sh bilioni 1 kama malipo ya awali ya utekelezaji wa miradi hiyo inayotarajiwa kuanza katika mwaka wa fedha 2024/2025.

Akizungumza na wananchi wa Ushirombo Julai 28,2024 Wilayani Bukombe mkoani Geita , Mhe.Katimba amesema ujenzi wa soko hilo unaenda sambamba na mahitaji ya kipindi cha sasa.

Amesema soko la sasa uwezo wake ni vibanda vinavyoweza kubeba wafanyabiashara 734 ambapo wenye vibanda halali ni 534 na wasio na vibanda ni 200.

Katimba amesema kuwa Serikali inawekeza Sh bilioni 15.89 kwenye ujenzi wa soko la kisasa litakalokuwa na mabanda kwaajili ya kutosheleza wafanyabiashara 1,301.

“Ndugu zangu hii ni baraka kubwa sana kwa kuwa uwezo wa soko utaongezeka , wafanyabiashara wenye vibanda ambao kwasasa wako 534 lakini soko likiboreshwa wataongezeka hadi kufikia wafanyabiashara 1,301.”

Amesema kwamba uwekezaji huo mkubwa hautawanufaisha wafanyabiashara peke yao bali utasaidia kuongeza mapato ya halmashauri ambapo awali halmashauri ilikuwa ikikusanya kiasi cha shilingi milioni 51.3 kwa mwaka lakini soko likijengwa mapato yataongezeka hadi kufikia shilingi bilioni 2.2 kwa mwaka.

kwa upande wa mradi wa stendi eneo la Ushirombo, Katimba amesema kuwa kwa sasa stendi hiyo ina uwezo wa kupokea mabasi 50 kwa siku lakini baada ya kujengwa itakuwa na uwezo wa kupokea mabasi yasiyopungua 210 kwa siku.

Aidha ameongeza kuwa baada ya ujenzi wa stendi kukamilika mapato yataongezeka kutoka Sh milioni 155 kwa mwaka hadi kufikia Sh bilioni 1.4 kwa mwaka.