Wananchi wilaya ya Bukombe wang'arisha Mwenge wa Uhuru 2018

Imewekwa: April 6th, 2018

Wananchi wilaya ya Bukombe wamekuwa wachangiaji wakubwa wa maendeleo katika sekta mbalimbali, katika mradi wa ujenzi wa vyumba vitatu vya kisasa vya madarasa shule ya sekondari  Ushirombo vyenye thamani ya fedha za kitanzania Milioni 56.1  ambavyo vimefunguliwa rasmi leo na kiongozi wa mbio za Mwenge wa Uhuru na Ndugu Charles Francis Kabeho huku wananchi wakiwa wamechangia  Milioni 3.24.

Pia ametembelea matengenezo ya barabara za ushirombo mjini zenye urefu wa km 10.5 ukiusisha ujenzi wa makaravati 2 kati ya 8 pamoja na mtaro wa maji mmoja, matengenezo haya yameanza rasmi tarehe 12.02.2018 yatakamilika tarehe 11.08.2018 kwa gharama shilingi za Kitanzania Milioni 275.4.

Ndugu Kabeho amezindua mradi wa maji kijiji cha ikuzi kitendo ambacho kimewarahisishia wakazi takribani 4500 wa kijiji hicho kupata maji kiurahisi ukilinganisha na hapo awali walipokuwa wakitembea umbali mrefu kutafuta maji. Mradi huo wenye vituo tisa vya kutolea maji umegharimu zadi ya  Milioni 305.

Katika uzinduzi huo, baadhi ya wananchi wa kijiji cha Ikuzi Consolatha John na Kibitz Mila wameshukuru serikali kwa kuleta mradi huu kwani umeondoa adha ya kutafuta maji umbali mrefu na kupunguza homa za matumbo.

Pia kiongozi wa mbio za mwenge amekabidhi hati kwa kikundi cha vijana wajasiriamalii BORA FOOD  ambacho kinamiliki kiwanda kidogo cha uchakataji nafaka. katibu wa kikundi hicho Bwana Wisdom Mola kwa niaba ya wanakikundi wenzake amesema wamefurahi na wameishukuru serikali kwa kutambua jitihada zao za kujikwamua kiuchumi na kuendeleza dhana ya Tanzania ya viwanda na kauli mbiu ya Mhe Rais ya hapa kazi tu, pia ametoa changamoto ya ukosefu wa soko la uhakika na nishati ya kutosha.

Ndugu Charles Francis Kabeho ameweka jiwe la msingi katika ujenzi wa miundo  mbinu mbali mbali yenye thamani ya Tsh ml 400, kama kliniki ya baba mama na mtoto, wodi ya watoto, jengo la maabara na nyumba ya mtumishi katika kituo cha afya Uyovu.

Katika eneo la mkesha wa Mwenge wa Uhuru kijiji cha Lyobahika, kiongozi wa Mbio za Mwenge ametoa wito kwa wananchi wa Bukombe kutunza na kuthamini miundombinu ya miraji inayoletwa na serikali kwa manufaa ya maendeleo ya wananchi, pia amesisitiza wazazi kuhakikisha watoto wanaenda shule kwani sera ya elimu bure intatoa nafasi kwa kila mtoto mwenye umri wa kwenda shule aende shule, kama kauli mbiu inavyosema "Elimu ni ufunguo wa maisha wekeza sasa kwa maendeleo ya Taifa letu" alisema Kabeho.

Kiongozi wa Mbio za Mwenge Ndugu Charles Francis Kabeho akikata utepe kuashiria utayari wa kufungua Jengo jipya la Madarasa Shule ya sekondari Ushirombo.

Jengo la kisasa la Vyumba Vitatu vya Madarasa vilivyofunguliwa na Kiongozi wa Mbio za Mwenge wa Uhuru Katika Shule ya Sekondari Ushirombo kata ya Bulangwa.

Mkuu wa wilaya ya Bukombe mhe.Josephat Maganga akipokea Mwenge wa Uhuru mwaka 2018 kutoka kwa Mkuu wa Wilaya ya Mbogwe mhe.Martha Mkupasi.

Dr Irene Mukerebe akisoma taarifa ya mapambano dhidi ya malaria katika mradi wa kugawa vyandarua kwa wamama wajawazito na watoto.

Kiongozi wa Mbio za Mwenge wa Uhuru Ndugu Charles Francis Kabeho akimpatia mama mwenye mtoto wa meiji 2 chandarua.

Kiongozi wa Mbio za Mwenge wa Uhuru 2018 Ndugu Charles Francis Kabeho akimtwisha ndoo ya Maji mmoja wa watumia maji kijiji cha Ikuzi.

Tenki la Maji linalopokea Maji kutoka Chanzo kikuu na kusambaza kwa Vituo tisa vinavyotoa huduma ya Maji kwa Wananchi.

Kiongozi wa Mbio za Mwenge amemkabidhi Katibu wa kikundi cha Viana Wajasiliamli Bwn.Wisdom Mola hati ya pongezi kwa kuwa na kiwanda kidogo cha uzalishaji nafaka.