BUKOMBE KUCHANJA WATOTO 66,591 ILI KUWAKINGA DHIDI YA SURUA NA RUBELLA.

Imewekwa: February 12th, 2024

Halmashauri ya Wilaya ya Bukombe imepanga kuchanja watoto 66,591 chanjo ya kuwakinga na magonjwa ya Surua na Rubella kwa muda wa siku 4 mfululizo kuanzia tarehe 15 - 18 Februari 2024

Akiongea wakati wa kikao cha Kamati ya Afya ya Msingi Wilaya (PHC)  Mkuu wa Wilaya ya Bukombe Mhe.Said Nkumba,  amewataka watoa huduma kuzingatia maadili na weredi wakati wote wa  zoezi hilo.

“Ndugu zangu tukazingatie misingi ya taaluma zetu kama vile  kujituma na nidhamu ya kazi ili tuweze kutoa huduma bora na kufikia malengo yaliyokusudiwa na Serikali."

Aidha Nkumba amewapongeza Idara ya Afya  pamoja na wajumbe wa kamati ya Afya Msingi Wilaya kwa jinsi wanavyofanya kazi na kufanikiwa katika kupambana na magonjwa mbalimbali ukiwemo ugonjwa wa kipindupindu.

“Pamoja na kuwepo mlipuko wa kipindupindu katika maeneo mengine lakini sisi Bukombe tupo salama. Nawapongeza sana.”

Kwa upande wake Mganga Mkuu wa Wilaya ya  Bukombe Dr. Deograsia Mkapa alisema lengo kuu la kampeni ni kuzuia kuenea kwa ugonjwa wa Surua na Rubella pamoja na kuongeza kinga kwa walengwa kama wameishapata chanjo katika utaratibu wa kawaida wa kutoa huduma za chanjo za kila siku.

Vilevile Mratibu wa Chanjo Wilaya Simon Misuzi alisema utoaji wa chanjo katika kampeni hii utahusisha vituo vya kudumu vya kutolea huduma za afya, huduma za mkoba, kliniki tembezi na vituo vya muda vitakavyoainishwa.

Naye Mchungaji wa Kanisa la Kiinjili la kilutheri Tanzania (KKKT) Usharika wa Furaha - Ushirombo Emmanuel Muhangwa alisema,

“Sisi kama Kanisa tupo tayari kuunga mkono jitihada za Serikali kwa kuhakikisha tunatokomeza ugonjwa huu hatari unaoweza kusababisha  masikio kutoa usaha ambao huweza kusababisha matatizo ya kutokusikia, vidonda vya macho vinavyoweza kusababisha ulemavu wa kutokuona , nimonia pamoja na utapiamlo."

Chanjo ya Surua na Rubella zinawahusu watoto wenye umri wa miezi 9 hadi miaka 5 na zinatolewa bure katika vituo vya kutolea huduma za Afya. Onesha Upendo Mpeleke Mtoto Akachanje.