Bukombe Watakiwa Kuongeza Wigo Ukusanyaji Mapato

Imewekwa: June 1st, 2021

Mkuu wa Mkoa wa Geita Mhe. Rosemary Senyamule ameitaka Halmashauri ya  Wilaya ya Bukombe kuongeza wigo wa ukusanyaji mapato ili kuipa Halmashauri uwezo wa kuteleleza miradi ya maendeleo na kujiendesha yenyewe.Mhe. Senyamule ameyasema hayo leo Juni Mosi, 2021 wakati wa kikao cha Baraza Maalumu la kupitia na kujadili hoja za Mkaguzi wa Hesabu za Serikali kwa mwaka wa fedha 2019/2021.

Aidha amebainisha kuwa Halmashauri  ya Wilaya ya Bukombe  haitaweza kutekeleza bajeti yake ipasavyo endapo haitakusanya mapato, hivyo amewataka Wakuu wa Idara na Vitengo kuwa wabunifu na kuhakikisha suala hilo linafanikiwa.

"Katika agenda ambayo hatutakiwi kulala usingizi basi ni hii ya ukusanyaji wa mapato, bila mapato Halmashauri itayumba na kushindwa kutekeleza miradi." Amefafanua Mkuu wa Mkoa.

Pia amewagiza Wakuu wa Idara na Vitengo kuhakikisha wanajibu hoja zote zikiwemo za siku za nyuma na za sasa  ili kuifanya Taasisi kwenda sambamba na matakwa ya kisheria

.Naye Mkaguzi Mkuu wa Hesabu za Serikali Mkoa wa Geita, Richson Ringo ametoa rai kwa Halmashauri  kuhakikisha inaijengea uwezo Kamati ya Ukaguzi ikiwa ni pamoja na kukaa vikao vya kisheria kwenye kila kipindi cha robo mwaka ili iweze kuishauri Halmashauri vizuri  namna ya kuenenda katika masuala ya kifedha.