BUKOMBE YAONGOZA KWA UTOAJI WA CHANJO YA SURUA NA RUBELLA KIMKOA

Imewekwa: February 20th, 2024

Mlezi wa Halmashauri ya Wilaya ya Bukombe kutoka ofisi ya Mganga Mkuu wa Mkoa wa Geita Dr. Stephen Mwaisobwa ameipongeza Halmashauri ya Wilaya ya Bukombe kwa kushika nafasi ya kwanza kimkoa katika kampeni ya kitaifa ya chanjo ya Surua na Rubella.

" Hongera Mganga Mkuu pamoja na timu yako kwa kuvuka lengo la kampeni kwani kwa kufanya hivyo mmeonyesha ni jinsi gani mnafanya kazi kwa ushirikiano."

Dr.Mwaisobwa ameyasema hayo  tarehe 19 Februari, 2024 wakati wa kikao cha Bodi ya Afya ya Wilaya robo ya pili (oktoba -  Disemba) 2023/2024 kilichofanyika katika ukumbi wa mikutano wa Hospital ya Wilaya ya Bukombe.

Aidha Mganga Mkuu wa Wilaya ya Bukombe Dr.Deograsia Mkapa amesema katika Halmashauri ya Wilaya ya Bukombe walengwa walikuwa ni watoto 66,591 na waliopata chanjo ni watoto 85,454 sawa na asilimia 128.3 na kupelekea kushika nafasi ya kwanza Kimkoa.

Aidha Dr.Mwaisobwa amewapongeza watumishi wa afya Wilaya ya Bukombe kwa kuhakikisha  vifo vya akina mama wajawazito na watoto vinapungua.

"Hongereni kwa juhudi kubwa mnazozifanya kwani kila mmoja wetu ana mchango wa  kuhakikisha akina mama wanahudhuria kliniki katika kipindi chote cha ujauzito na wakati wa kujifungua."

Kwa upande wake Diwani wa Kata ya Bulega Mhe.Erick Kagoma ameipongeza serikali ya Jamhuri ya Muungano wa Tanzania kwa kuhakikisha inajenga vituo vya afya na zahanati ili wananchi waweze kupata huduma hiyo muhimu karibu na maeneo yao.