BUKOMBE YAPONGEZWA KWA USIMAMIZI WENYE TIJA WA MIRADI YA MAENDELEO

Imewekwa: February 23rd, 2024

Mwenyekiti wa  CCM Mkoa wa Geita Nicholaus Kasendamila amewapongeza viongozi kuanzia ngazi ya kitongoji, kijiji, kata hadi Wilaya kwa usimamizi mzuri na wenye tija wa miradi ya maendeleo huku akiwataka kuendeleza moyo huo huo katika miradi mingine inayokuja.

"Hongereni kwa utekelezaji mzuri wa miradi ya maendeleo, fedha za Mhe. Rais wa Jamhuri ya Muungano wa Tanzania mmezitendea haki."

Kasendamila ameyasema hayo wakati wa ziara ya kamati ya siasa Mkoa wa Geita ya ukaguzi wa miradi ya maendeleo Wilayani Bukombe.

Miradi iliyotembelewa ni pamoja na mradi wa ujenzi wa shule mpya ya sekondari Bulangwa, ukamilishaji wa zahanati ya Bwenda, ujenzi wa mfereji wa maji katika barabara za Butambala - Imalamagigo, uchimbaji wa kisima kirefu kijiji cha Azimio na ujenzi wa madarasa 16, jengo la utawala , vyoo na kichomea taka katika shule ya msingi mpya Namonge.