Bulangwa Wasogezewa Huduma za Afya

Imewekwa: June 10th, 2021

Kamati ya Siasa ya Halmashauri Kuu ya Chama Cha Mapinduzi (CCM) na Sekretarieti Mkoa wa Geita imefurahishwa na Matumizi ya Tshs. Milioni 63 zilizojenga Wodi ya Wagonjwa wa Nje, Wodi ya Mama na Mtoto, Nyumba ya Watumishi, Wodi ya Wazazi na Vyoo vya Wagonjwa na Watumishi kwenye Zahanati ya Bulangwa wilayani Bukombe ambayo mwaka 2020 ilianza kutoa huduma na kusaidia kupunguza Vifa vitokanavyo na  Uzazi.Hayo yamejidhihirisha leo tarehe 10 Juni, 2021 baada ya Mwenyekiti wa CCM Mkoa wa Geita, Alhadji Said Kalidushi kukagua zahanati hiyo na kuipongeza Halmashauri ya Wilaya ya Bukombe kwakutumia fedha vizuri na kufanikisha kutekeleza Mradi kwa ufanisi mkubwa ambapo ameita juhudi hizo kuwa ni za kizalendo.

Wakati huohuo Kamati ya Siasa ya Mkoa imeridhishwa na jinsi Halmashauri hiyo inavyojali makundi ya vijana, wanawake na walemavu kwa kuwapatia mikopo inayosaidia kuendesha Shughuli mbalimbali za ujasiriamali kwani ilipotembelea Kikundi cha Amani Maseremala kilichopo Masonga-Runzewe Mashariki kilichoanzishwa Julai 2019 Katibu wa kikundi hicho alielezea kuwa wamekopeshwa Milioni 4 kwa ajili ya kununua vitendea kazi vya kisasa ili watengeneze samani za kimataifa.

Awali, Mkuu wa Wilaya hiyo Mhe. Said Nkumba amefafanua kuwa Wilaya ya Bukombe inawahudumia wananchi wote bila kujali tofauti za dini na vyama na kwamba Wilaya hiyo inasimamia uvunaji wa mbao wanazotumia wajasiriamali hao ili zivunwe kwa kufuata taratibu na Sheria pasipo  kuharibu mazingira kwa kukata misitu.

Awali, Mwenyekiti wa CCM Mkoa wa Geita Alhadji Said Kalidushi ametoa rai kwa viongozi wa Wilaya hiyo kurekebisha Mapungufu yaliyojitokeza kwenye  Miundombinu ya machinjio ya Mwalo hasa kukosekana kwa nishati ya Umeme, Choo na Mazingira ya Usafi wa machinjio hayo ili eneo liwe nadhifu na kwa kipindi cha ukarabati kamati hiyo imeelekeza kufungwa kwa muda kwa machinjio hayo ambapo watumie machinjio ya Katente wakati wa mpito.

Baadae, Kamati hiyo ilifika kwenye Mradi wa Ukamilishaji wa Ujenzi wa Nyumba 10 za watumishi wa Halmashauri ya Bukombe ambao mwaka 2012/13 serikali ilitoa Tshs. Milioni 30 kwa kila Nyumba na baadaye ilionekana kuwa fedha hizo kuwa pungufu kwani kila Nyumba ina gharama za Milioni 60 ya ujenzi. Mwaka 2021/22 serikali imeomba fedha kutoka serikali kuu kukamilisha ujenzi wa Nyumba hizo.

Vilevile, Mwenyekiti wa CCM Mkoa amewapongeza Wakala ya Maji na Usafi wa Mazingira Vijijini  (RUWASA) na Kamati ya jumuiya ya watumia Maji kwa kazi nzuri na Usimamizi mzuri wa Mradi wa Maji Buganzu-Uyovu ambapo kwa muda mfupi tayari wameshakusanya zaidi ya Tshs. Milioni 43. Aidha, Mradi huo umegharimu Tshs. Milioni 158 na zaidi ya watu 2000 wananufaika 

Bi. Rahel Ndegeleke, Katibu wa CCM Mkoa wa Geita ametoa rai kwa TANESCO kumaliza tatizo la Uhaba wa Mita za Umeme  kwa wateja wapya wanaopeleka maombi ya kuunganishwa na huduma za umeme wilayani Bukombe.

Kabla ya Kamati hiyo kuhitimisha ziara wilayani Bukombe , Sauti ya furaha ya Mwenyekiti wa CCM Mkoa wa Geita ilisikika tena baada ya kutembelea Mradi wa Ukamilishaji wa kituo cha Afya Namonge-Siloka ambao uliasisiwa na wananchi mwaka 2012 kwa kutoa eneo la hekari 6 na kuanzisha ujenzi ambapo Serikali iliongeza nguvu na kupelekea pamoja na nguvu za wananchi na wadau mbalimbali jumla ya Tshs. Milioni 274 zitatumika kukamilisha.