CHETI CHA PONGEZI CHAKABIDHIWA KWA MSIMAMIZI WA CBWSO- UYOVU

Imewekwa: February 10th, 2024

Mkuu wa Wilaya ya Bukombe Mhe.Said Nkumba kwa niaba ya Mkurugenzi Mkuu wa RUWASA Makao Makuu amemkabidhi Shija Jonas cheti cha pongezi ikiwa ni kutambua mchango wake wa Uongozi bora na Ubunifu katika usimamizi mzuri wa Chombo cha  Watoa huduma ya Maji  Ngazi ya Jamii Uyovu. (CBWSO).

"RUWASA Makao Makuu imetambua ubunifu wako kwa kuhakikisha CBWSO ya Uyovu inafanya vizuri na wananchi wanapata huduma ya maji safi na salama."

Cheti hicho cha pongezi kimetolewa katika kikao kazi robo ya pili ya mwaka 2023/2024 Mkoa wa Geita kilichofanyika Wilayani Bukombe tarehe 9 Februari, 2024 kikiwa na lengo la kubadilishana uzoefu ili kuleta mabadiliko chanya katika sekta ya maji.

Sambamba na ugawaji wa cheti Nkumba alikabidhi pikipiki 3  zilizotolewa na Wakala wa Maji na Usafi wa Mazingira Vijijini (RUWASA) Wilaya ya Bukombe kwa Chombo cha Watoa Huduma ya Maji ngazi ya Jamii  Namonge, Runzewe Mashariki na Katome huku akitoa rai kwa  vyombo hivyo kuhakikisha pikipiki hizo zinatumika kwa malengo lililokusudiwa.

"Nataka kuona pikipiki hizi zinatumika kwa malengo lililokusudiwa ili wananchi wetu waweze kupata huduma bora na kufikia adhima ya serikali ya kumtua mama ndoo kichwani."

Vile vile Nkumba ameipongeza Serikali ya Jamhuri ya Muungano wa Tanzania kwa kutoa fedha nyingi katika Sekta ya Maji.

"Serikali imekuwa ikitoa fedha nyingi sana katika Sekta ya Maji, sisi kama Serikali tutahakikisha kuwa fedha hizi zinatumika kwa malengo yaliyokusudiwa na kuleta mabadiliko chanya kwa wananchi.

Aidha ameipongeza RUWASA kwa kufanya kazi kwa uwadilifu na weredi mkubwa.

"Mmekuwa mkifanya kazi kwa uwazi na kujituma ili kuhakikisha kuwa rasilimali zinatumika ipasavyo kwa manufaa ya wananchi wote."

Kwa upande wake Meneja wa RUWASA  Mkoa wa Geita  Mhandisi Jabiri Kayilla amesema  Wakala wa Maji na Usafi wa Mazingira Vijijini  itahakikisha inatoa huduma bora ya maji safi na salama ili kupambana na  magonjwa kama vile kipindupindu, kuhara, homa za matumbo ili kuzuia maafa na kuboresha afya za jamii kwa kiasi kikubwa.