DAS Bukombe awataka watumishi wa Umma kufanya kazi kwa kuzingatia maadili

Imewekwa: June 12th, 2019

Katibu Tawala wa Wilaya ya Bukombe, Paul Cheyo kwa niaba ya Mkuu wa Wilaya amewataka watumishi wa kituo cha Afya Ushirombo kufanya kazi kwa kuzingatia maadili ya Utumishi wa umma ili kujiepusha na vitendo vya rushwa.

Wito huo aliutoa wakati akikabidhi mradi wa majengo ya huduma za afya katika kituo cha Afya Ushirombo kilichopo Kata ya Bulangwa kwa watalamu wa kituo hicho ili kianze kutoa kuhuduma kwa wananchi.

Cheyo alisema iwapo watalamu wa Afya katika kituo hicho watatoa huduma vizuri kwa wagonjwa kwa kuzingatia madili itapunguza msongamano wa wagonjwa kwenye Hospitali ya Wilaya ya Bukombe.

"Toeni huduma bora kwa wananchi ili kupunguza msongamano katika Hospitali ya Wilaya"

Alimuagiza Mkurugenzi Mtendaji wa Halmashauri ya Wilaya ya Bukombe Dionis Myinga kufuatilia vifaa tiba hasa vya chumba cha Upasuaji na kuhakikisha anaongeza madaktari na waunguzi wa kutosha katika kituo hicho cha afya ili kuondoa changamoto ya utoaji huduma kwa wagonjwa.

Mwenyekiti wa kamati ya ujenzi kituo cha Afya Ushirombo Antony Kuya alisema Serikali ilitoa fedha kwa ajili ya ujenzi wa jengo la wazazi, jengo la upasuaji, jengo la maabara ya kisasa, nyumba ya mtumishi, jengo la kuhifadhia maiti, jengo la kufulia nguo, barabara ya kutembelea wagonjwa, jengo la kupokea na kusambaza umeme.

Kuya alisema mradi huo wa serikali uliletewa fedha sh 500 milioni kati ya fedha hizo zilizotumika hadi kukamilika sh 461.4 milioni na kubakiza kiasi cha sh 1.8 milioni.

Mganga Mfawidhi Kituo cha Afya Ushirombo Dk Henry Sahani alisema ujenzi ulianza Julai mwaka 2018 na umekamilika Februari 2019 kituo hicho cha afya ni miongoni mwa vituo nchini vilivyopata fedha toka serikali kupitia mfuko wa Afya.

Dk Sahani alisema kabla hawajakamilisha jengo la upasuaji kulikuwa na changamoto kubwa kuanzia januari 2019 waliopewa rufaa kwenda Hospitali ya Wilaya kufanyiwa upasuaji hasa kina mama wajawazito wanaoshindwa kujifungua kwa njia ya kawaida.

Dk Sahani alisema kituo cha Afya Ushirombo kinapokea wagonjwa wengi kutoka Kata jirani ya Lyambangongo, Ushirombo na Igulwa hivyo aliiomba serikali kuhakikisha inaleta vifaa vya chumba cha upasuaji na kuoongeza wataalamu wa kutosha ili kutoa huduma bora kwa wananchi.

Katibu Tawala wa Wilaya ya Bukombe Paul Cheyo akimkabidhi hati ya majengo Mwenyekiti wa Kamati ya Ujenzi Kituo cha Afya Ushirombo Antony Kuya tayari kwa kuanza kutumika.

Katibu Tawala wa Wilaya ya Bukombe Paul Cheyo wakiwa na viongozi mbalimbali wakijiridhisha moja ya vifaa tiba vilivyowekwa kwenye Mjengo hayo mapya