Viongozi na wataalamu wapatiwa mafunzo ya ujumuishwaji wa masuala ya lishe

Imewekwa: November 18th, 2018

Viongozi na Wataalamu kutoka ngazi ya Halmashauri  ya Wilaya ya Bukombe wamepatiwa mafunzo ya ujumuishwaji wa masuala ya lishe katika mpango wa bajeti kwa mwaka wa fedha 2019/2020. Mafunzo hayo yamefanyika katika ukumbi wa mikutano wa Halmashauri tarehe 16 November, 2018. Lengo likiwa ni kujadiliana kwa kina na hatimaye kuhakikisha masuala yote muhimu ya lishe yanajumuishwa katika vipaumbele vya Halmashauri vitakavyotekelezwa kupitia mipango wa bajeti.

Akifungua mafunzo  hayo Mkuu wa Wilaya ya Bukombe Mhe. Said Nkumba alisema “Ni dhahiri kuwa lishe bora katika jamii ni kichocheo cha maendeleo katika nyanja zote (Afya, Kilimo, Elimu, Biashara na Uchumi) na pale tu ambapo athari za lishe duni zitakapodhibitiwa au kutokomezwa ndipo malengo ya maendeleo katika nyanja hizi yataweza kufikiwa kwa ufanisi”

Mhe. Nkumba aliendelea kuelezea umuhimu wa lishe bora kwa watoto hasa katika kipindi cha siku 1000 za mwanzo wa maisha yao yaani tangu mimba kutungwa mpaka anapotimiza miaka miwili. "kipindi cha siku 1000 za mwanzo ndiyo msingi thabiti  katika ukuaji wa mwili na akili pamoja na maendeleo mazuri ya ukuaji wa ubongo, uwezo mzuri wa kukabiliana na maradhi, uwezo mkubwa wa akili za utambuzi, uwezo wa kujifunza na uwezo  wa kujiingizia kipato wakiwa watu wazima".

Naye Katibu wa afya Ndg. Remigius A. Mayasa kwa niaba ya Afisa Lishe Wilaya alisema lishe duni kwa wanawake wajawazito inawaweka katika mazingira hatarishi zaidi yanayoweza kusababisha kujifungua watoto njiti au wafu, watoto wenye mtindio wa ubongo au hata mimba kuharibika. Lishe duni huwadhoofisha wanawake wajawazito na hivyo wengi wao huugua mara kwa mara na kupata upungufu wa damu ambao huwaongezea uwezekano wa kupoteza maisha yao wenyewe na watoto wao kabla, wakati au baada ya kijififungua .

Ndg. Mayasa aliendelea kusema kuwa  hata hivyo kitengo cha lishe kinaendelea kutekeleza huduma za lishe kwa kuhakikisha kinafanya kazi ya kuelimisha jamii juu ya ulaji unaofaa kwa wanawake wajawazito, wanaonyonyesha  na  watoto wachanga  pamoja na kuboresha ulaji wa vitamini muhimu na kuzuia magonjwa yanayotokana na upungufu wa viini lishe. Aliyasema hayo wakati wa mapitio ya shughuli za lishe kwa mwaka wa fedha 2017/2018.

Kwa upande wake mwakilishi wa maswala ya lishe kutoka Ofisi ya Rais Tawala za Mikoa na Serikali za Mitaa Ndg. Peter Kaswahili alisema swala la lishe siyo la idara ya Afya pekee  yake hivyo amewataka wakuu wa idara na vitengo kuhakikisha  wanaweka shughuli za lishe katika uwaandaaji wa  bajeti  kwa mwaka wa fedha 2019/2020 kwani itasaidia kuwekeza katika siku 1000 za mwanzo ambapo akili za watoto  zinaumbwa.

Akihitimisha mafunzo hayo Mkuu wa idara ya kilimo Ndg Joseph Machibya kwa niaba ya Mkurugenzi Mtendaji  ameishukuru Serikali kupitia OR–TAMISEMI na Taasisi ya Chakula na Lishe Tanzania kwa kuendelea kuandaa na kuendesha mafunzo  kwa wahusika katika ngazi ya Halmashauri kuhusu ujumuishwaji wa masuala lishe.