Wananchi wa Isemabuna wakabidhiwa vyumba 2 vya madarasa na ofisi 1

Imewekwa: November 10th, 2018

Wananchi wa kijiji cha Isemabuna kata ya Butinzya wamekabidhiwa vyumba  viwili vya madarasa, ofisi moja ya walimu pamoja na madawati 60 ya shule ya msingi Isemabuna. Msaada huo umetolewa na Ndg. Mohamed Ayobu kutoka Jumuiya ya Istiqaama Internationa iliyopo nchini Oman lengo likiwa  ni kuhakikisha wanafunzi wanapata elimu bora itakayowasaidia kuondokana na adui ujinga.

Makabidhiano hayo yameshuhudiwa na Mkuu wa Wilaya ya Bukombe Mhe. Said Nkumba, viongozi wa serikali, viongozi wa dini, wanasiasa, wataalamu, walimu, wazazi pamoja na wanafunzi tarehe 10 Novemba, 2018.

Akizungumza katika makabidhiano hayo Mwalimu Mkuu wa Shule hiyo Ndg. Steven S. Igoko amemshukuru Ndg. Mohamed kwa kujitoa kwa hali na mali kuhakikisha miundombinu  inajengwa na ameahidi kuitunza.“Tunashukuru kwa msaada wako wa moyo wa huruma na wakujitolea. Uongozi wa shule unapenda kukuthibitishia kuwa miundombinu hiyo itatunzwa kwa nguvu  zote ili iweze kutumika kwa mda mrefu”

Aidha Mwl Igoko aliendelea kusema kuwa shule ya Isemabuna inakabiliwa na changamoto ya uhaba wa walimu pamoja na nyumba za walimu kwani mpaka sasa shule ina upungufu wa walimu 6 na nyumba 14 za walimu. Upatikanaji wa walimu pamoja na nyumba za watumishi utasaidia kufanikisha mabadiliko ya kitaaluma katika eneo la ufundishaji.

Naye Msemaji wa Jumuiya ya Istiqaama Intenational kutoka kanda ya Ziwa Ndg. Juma Ismail alisema jumuiya hiyo imeishaonyesha mwanga katika Wilaya ya Bukombe pia inafanya kazi katika nchi ya Ghana, Nigeria, Kenya, Mali na Afrika ya Kusini ili kuwasogezea huduma bora wananchi wote pasipo kuangalia itikadi zao za kidini.

Akiongea katika  Makabidhiano hayo Ndg. Mohamed Ayobu ameahidi kujenga Msikiti na kutoa Tsh 5,000,000.00 kwa ajili ya kuanzisha ujenzi wa Zahanati ambayo ni sadaka yake kwa wananchi wa kijiji hicho ili kusogeza huduma kwa akina mama wajawazito na watoto chini ya umri wa miaka mitano. Pia amewashukuru wananchi kwa kuacha shughuli zao na kuhudhuria sherehe za makabidhiano hayo.

Mkuu wa Wilaya ya Bukombe Mhe.Nkumba ameishukuru Jumuia ya Istiqaama International kutoka Oman kwa niaba ya Serikali kwa kuboresha huduma za kijamii kwa wananchi.”Natoa shukrani zangu kwa niaba ya serikali kwani kutoa ni moyo na ni njia mojawapo ya kujiwekea hazina kwa Mwenyezi Mungu, Kwani mmetumia nguvu zenu kwa ajiri ya kutatua matatizo ya wananchi”

Pia Mhe. Nkumba ametoa tahadhari kwa wazazi wasiotaka watoto wa kike wasiendelee na masomo ya Sekondari.”Sitapenda kuona  watoto wa kike waliomaliza shule za msingi na kufaulu kwenda sekondari wanaozeshwa   na kama mmekwishapokea mahali  kwa watoto waliofaulu kwenda sekondari kakikisheni mnarudisha fedha kwani ninawahakikishia kuwa harusi  hizo hazitafanyika”

DC Nkumba amewagiza viongozi wa makanisa na misikiti kuhakikisha wanajiridhisha na ndoa zinazofungwa.”Masheikh, Wachungaji na Maparoko kama mnafungisha ndoa hakikisheni mnajiridhisha na ndoa hizo kama ni wanafunzi ama si wanafunzi vinginevyo tutawakamata na kuwaweka ndani na kuhakikisha sheria inachukua mkondo wake, tunataka mabinti zetu wasome”

Jumuiya ya Istiqaama International imeweza kukarabati vyumba 4 vya madarasa pamoja na visima viwili vya maji. kwa historia shule ya Msingi Isemabuna ilianzishwa mwaka 2002 mpaka sasa ina jumla ya wanafunzi 616 kuanzia darasa la awali hadi darasa la saba wavulana wakiwa 331 na wasichana 285 na jumla ya walimu 8.

Ndg.Mohamed Ayobu akiongea na baadhi ya wananchi wa kijiji cha Isemabuna.

Baadhi ya madawati yaliyotolewa na Jumuia ya Istiqaama Internatinal.

Mkuu wa Wilaya ya Bukombe Ndg Said Nkumba akitoa shukrani kwa niaba ya Serikali kwa Jumuia ya Istiqaama International.