DC MURAGILI AFANYA ZIARA YA KUSIKILIZA NA KUTATUA KERO ZA WANANCHI

Imewekwa: July 25th, 2025

Mkuu wa Wilaya ya Bukombe Mhe. Paskasi Muragili amefanya ziara katika vijiji vya Nampalahala na Busonzo Kata ya Busonzo tarehe 24 Julai, 2025 kwa lengo la kusikiliza na kutatua kero za wananchi huku akiwataka wananchi kuacha kufanya shughuli za kilimo katika maeneo ya hifadhi.

Muragili amewataka wananchi hao kushirikiana kutunza maeneo ya hifadhi na kuacha kufanya shughuli za kilimo katika maeneo ya hifadhi ya msitu wa Biharamulo-Kahama ili kutunza mazingira na rasilimali zilizopo kwaajili ya kukuza uchumi na pato la taifa.

“Hakuna anayeruhusiwa kulima wala kujenga katika maeneo ya hifadhi, hivyo hadi ifikapo tarehe 30 Novemba, 2025 wakulima wote wawe wamevuna mazao yao na asiruhusiwe tena mtu yoyote kuingia”

Aidha Muragili ameagiza kukutana na wafugaji wa Kata za Busonzo, Runzewe mashariki, Runzewe magharibi na Uyovu kwa lengo la kuzungumza nao ili kumaliza mgogoro wa wafugaji kulisha kwenye mashamba ya wakulima.

Mbali na kusikiliza kero za Wananchi, DC Muragili amewasisitiza wananchi wa kushiriki nguvu kazi katika ujenzi wa vyumba vya madarasa mawili katika kijiji cha Nampalahala kwaajili ya kupunguza adha ya wanafunzi kutembea umbali mrefu.

Ziara hiyo ni muendelezo wa utaratibu wa Serikali katika kuwafikia wananchi na kutatua changamoto zao.