DC MURAGILI AWATAKA WAKULIMA KUWEKA AKIBA YA CHAKULA-BUKOMBE

Imewekwa: April 18th, 2024

Mkuu wa Wilaya ya Bukombe Mhe. Paskasi Muragili amewataka wakulima kuweka akiba ya Chakula cha kutosha kwa mwaka mzima badala ya kukimbilia kuuza kiholela.

Kauli hiyo ameitoa tarehe 18 April 2024 wakati akizungumza na Wananchi wa Kata ya Igulwa katika Ziara yake ya kusikiliza na kutatua kero za Wananchi pamoja na kutembelea na kukagua Miradi ya Maendeleo.

Mhe. Muragili amesema kila mkulima anapaswa kuweka akiba ya mazao yake yatakayo muwezesha kumfikisha katika msimu mwingine wa kilimo ili kuweza kuepukana na maswala ya njaa katika familia.

“Ni jambo la aibu kwa familia kukosa chakula na kuanza kuwa ombaomba, hatutarajii kusikia kilio cha chakula kwa Wananchi wetu”.

Muragili amesema kuwa baadhi ya wakulima wamekuwa wakipata tamaa ya kuuza mazao yao yote waliyovuna na baadae kuanza kulalamika kuhusu njaa na kuomba Serikali iwape msaada wa chakula.

“Tunzeni chakula chenu ila baadae bei ikiwa nzuri muweze kuuza mavuno yenu kwani mkifanya hivyo mtaona faida ya kilimo chenu”.

Aidha Mhe. Muragili amewasisitiza wakulima kutumia mbolea na kufuata njia bora za kilimo ili waweze kupata mazao yenye tija.

Vilevile katika ziara hiyo Muragili ametembelea mradi wa ujenzi wa jengo la OPD katika kituo cha Afya cha Igulwa ambacho kimejegwa kwa nguvu za Wananchi pamoja na mfuko wa jimbo, jengo hilo lipo katika hatua ya lenta na mradi umegharimu kiasi cha Shilingi 13,793,500/=

Pia Mhe. Muragili alipata fursa ya kutembelea mradi wa ujenzi wa shule maalum ya Awali na Msingi ya mchepuo wa kiingereza ya Bukombe Vision ambayo inajengwa na fedha kutoka mapato ya ndani.

Kwa upande wake Diwani wa Kata ya Igulwa Mhe. Richard Mabenga amemshukuru Mkuu wa Wilaya kufanya ziara katika Kata yake Kwani Wananchi wamepata fursa ya kutatuliwa kero zao.