DC NKUMBA AKOSHWA NA MIRADI YA RUWASA

Imewekwa: February 17th, 2024

Mkuu wa Wilaya ya Bukombe Mhe.Said Nkumba  ameridhishwa na utekelezaji wa miradi ya maji  inayotekelezwa katika Wilaya ya Bukombe hususani mradi wa uchimbaji wa Kisima Kirefu katika kijiji cha Azimio kata ya Uyovu.

"Nimefurahishwa sana na usimamizi mzuri wa mradi huu ambao utapelekea huduma ya maji katika eneo hili  inakuwa toshelezi na ya uhakika."

Nkumba ameyasema hayo tarehe 16 Februari, 2024 wakati alipotembelea utekelezaji wa mradi huo.

Aidha Meneja wa RUWASA Wilaya ya Bukombe Mhandisi James Benny alisema katika mwaka wa fedha 2023/2024 Wilaya ya Bukombe imepokea kiasi cha shilingi 320,000,000.00 kwa ajili ya  uchimbaji wa visima 10 katika vijiji vya Bukombe 2, Iyogelo1, Azimio 1, Musasa 1, Busonzo 1, Silamila 1, Nalusunguti 1, Miyenze 1 na Bufanka 1.

Mhandidi James aliendelea kusema kuwa jumla ya visima 8 vimechimbwa na kati ya hivyo visima 5 vimepata maji na 3  vimekosa katika kijiji cha Silamila, Msonga na Bukombe na mpaka sasa wanaendelea na uchimbaji wa kisima cha 9 katika kijiji cha Azimio.

Vile vile alisema " Baada ya ukamilishaji wa uchimbaji wa kisima cha maji katika kijiji cha Azimio, kwa mwaka wa fedha 2024/2025 RUWASA imepanga kujenga miundombinu ya usambazaji maji kama vile tenki, vituo vya kuchotea maji na ulazaji wa mabomba.

Kwa upande wake Diwani wa Kata ya Uyovu Mhe. Inyasi Kulusaga amewataka RUWASA kuendelea kutoa elimu kwa wananchi ya kutumia maji yaliyopata tiba ambayo ni maji safi na salama.