DC Nkumba Nkumba Awapongeza Walimu Ufaulu Kidato cha Nne.

Imewekwa: January 28th, 2022

Mkuu wa Wilaya ya Bukombe Mhe.Said Nkumba amewapongeza walimu pamoja na wadau wa elimu kwa kuwezesha wanafunzi kufanya vizuri katika mitihani yao ya kuhitimu kidato cha nne.

"Ninawapongeza walimu, wamefanya kazi kubwa ya kuhakikisha watoto wetu wanafaulu. Kimkoa tumekuwa wa kwanza matokeo ya kidato cha nne na cha pili vile vile matokeo ya darasa la sana tumeshika nafasi ya pili kimkoa."

"Mimi pamoja na watumishi wenzangu wa serikali tupo imara kwa ajili ya kutekeleza Ilani ya Chama cha Mapinduzi katika sekta zote."

Pongezi hizo amezitoa leo tarehe 28 Januari, 2023 wakati wa kikao cha Halmashauri kuu ya CCM Wilaya ya Bukombe.

Akiwasilisha taarifa ya utekelezaji wa Ilani ya Uchaguzi ya 2020 - 2025 kwa kipindi cha Julai - Disemba 2021 Nkumba amesema Idara ya Afya imepokea kiasi cha shilingi Milioni 250 kwa ajili ya ujenzi wa kituo cha Afya Bufanka, Milioni 300 kwa ajili ya upanuzi wa kituo cha Afya Bulega, Milioni 300 kwa ajili ya ujenzi wa jengo la dharura hospitali ya Wilaya ya Bukombe na Milioni 90 kwa ajili ya ujenzi wa nyumba 2 za watumishi wa afya.

Aidha Idara ya Elimu Msingi imetumia kiasi cha Shilingi Milioni 789.2 kati ya 860 zilizotolewa kutokana na Mpango wa Maendeleo kwa Ustawi wa Taifa na Mapambano dhidi ya UVIKO - 19 katika ujenzi wa vyumba 43 katika shule za Msingi shikizi 10. Mnamo tarehe 25 Disemba, 2021 halmashauri ilipokea tena kiasi cha shilingi Milioni 112.5 kwa ajili ya ukamilishaji wa shule za msingi 5 fedha kutoka serikali Kuu.

Kwa upande wa Idara ya Elimu Sekondari halmashauri ilipokea kiasi cha shilingi Bilioni 2.1 fedha kutoka Mpango wa Maendeleo kwa Ustawi wa Taifa na Mapambano dhidi ya UVIKO - 19 kwa ajili ya ujenzi wa vyumba 64 vya madarasa katika shule za sekondari 17, Milioni 150 kwa ajili ya ukamilishaji wa Maabara, Milioni 112 kwa ajili ya ukamilishaji wa vyumba vya madarasa katika shule za sekondari 5 na Milioni 470 kwa ajili ya ujenzi wa shule mpya ya sekondari Ng'anzo.

Naye Mbunge wa Jimbo la Bukombe na Waziri wa Madini Mhe. Doto Biteko amempongeza Mhe Rais wa Jamhuri ya Muungano wa Tanzania kwa kutoa fedha nyingi kwa ajili ya utekelezaji wa miradi ya Maendeleo.

"Rais anamapenzi ya dhati na Wilaya ya Bukombe na Taifa kwa ujumla ndiyo maana amezidi kutoa Mamilioni ya fedha kwa ajili ya utekelezaji wa miradi mbalimbali ya maendeleo.

Aidha amewataka wajumbe wa Halmashauri Kuu ya Chama kupendana na kuwa na umoja ili kuijenga Bukombe.

"Tupendane, tuwe na umoja na tuthaminiane ili tuweze kuijenga Bukombe yetu."

Walioshiriki kikao hicho ni pamoja na wajumbe wa halmashauri Kuu ya Wilaya CCM, wakuu wa Idara na Vitengo pamoja na Wakuu wa Taasisi za Serikali.