DC Nkumba awataka viongozi wa serikali kuwa waadilifu

Imewekwa: March 9th, 2019

Mkuu wa Wilaya ya Bukombe Mhe. Said Nkumba amewataka viongozi wa Wilaya kuhakikisha wanakuwa waadilifu katika kusimamia shughuli za serikali kwa sababu makosa mengi ya rushwa yanasababishwa na ukiukwaji wa maadili ya utumishi wa Umma

Nkumba aliyasema hayo wakati akifungua mafunzo ya kikao kazi cha wajumbe wa kamati ya  Uadilifu, Kamati ya Ulinzi na Usalama pamoja na wakuu wa Idara na Vitengo  wa Wilaya ya Bukombe kuhusu utekelezaji wa Mkakati wa Taifa Dhidi ya Rushwa Awamu ya tatu (2017-2022) tarehe 8 Machi, 2019 katika ukumbi wa mikutano wa Halmashauri.

Nkumba aliwakumbusha viongozi hao kuhakikisha wanapambana na rushwa ili taifa libaki kwenye utaratibu na misingi mizuri ya kusukuma jitihada za serikaili. ”Palipo na rushwa hakuna utawala bora, palipo na rushwa serikali haiwezi kukusanya kodi, palipo na rushwa shughuli za serikali lazima zitakwama”.

Mratibu wa kitengo cha Utawala  Bora  na Maboresho kutoka Ofisi ya Rais TAMISEMI  Apolinarary Tamayamali alisema malengo ya mahususi ya Awamu ya Tatu ya Mkakati wa Taifa dhidi ya rushwa ni kuimarisha ufanisi, uwazi na uwajibikaji wa utoaji wa huduma katika sekta ya Umma na binafsi, kutekeleza kwa ufanisi mikakati ya mapambano dhidi ya rushwa, kuzijengea uwezo Taasisi simamizi za mapambano dhidi ya rushwa na kuwa na uongozi madhubuti wa kisiasa katika mapambano.

Akifunga kikao kazi hicho Katibu Tawala Wilaya Paul Cheyo kwa niaba ya Mkuu wa Wilaya  aliwapongeza na kuwashukuru wawezeshaji kutoka Ofisi ya Rais TAMISEMI na TAKUKURU kwa mada nzuri walizowasilisha ili kuhakisha kamati ya maadili  Wilaya inapambana na rushwa.

Mkuu wa Wilaya ya Bukombe Mhe. Said Nkumba (mwenye nguo nyeusi katikati) akiwa na washiriki wa mafunzo pamoja na wawezeshaji kutoka Ofisi ya Rais TAMISEMI na TAKUKURU.

Kamanda wa Taasisi ya kuzuia na Kupambana na Rushwa (TAKUKURU)  Wilaya ya Bukombe David Ndyamukama akiwasilisha mada .

Washiriki wa kikao kazi wakipata maelekezo kutoka kwa Mratibu wa kitengo cha Utawala  Bora  na Maboresho Apolinarary Tamayamali (aliyesimama) jinsi ya kuandaa  mpango kazi kwa ajili ya utekelezaji wa mkakati wa Taifa dhidi ya rushwa Awamu ya Tatu.

 Mratibu wa kitengo cha Utawala  Bora  na Mboresho Apolinarary Tamayamali kutoka ofisi ya Rais TAMISEMI akielezea historia ya mapambano dhidi ya rushwa hapa nchini