DC Nkumba nialikeni nipo tayari kulala hapa

Imewekwa: July 29th, 2020

Mkuu wa Wilaya ya Bukombe Mhe. Said Nkumba amewaambia wananchi wa kijiji cha Namalandula kuwa yupo tayari kulala siku mbili kijijini hapo kwa ajili ya ukamilishaji wa jengo la zahanati na vyumba vitano vya madarasa katika shule ya msingi Namalandula.

“Nipo tayari kulala kijijini hapa kwa ajili ya kushiriki ujenzi wa miradi ya maendeleo. Nialikeni nipo tayari kulala.”

Nkumba ameyasema hayo jana tarehe 28 Julai, 2020 alipofanya ziara ya kutembelea na kukagua miradi ya maendeleo katika kata ya Namonge kijiji cha Namalandula na kujionea wananchi walivyojitolea na kuhakikisha zahanati ya Namalandula inajengwa.

“Majibu ndiyo haya tunaposema tushirikishe wananchi katika kuchangia miradi ya maendeleo.”

Pia amewawapongeza wananchi kwa kushiriki kikamilifu katika uchangiaji wa fedha za miradi ya maendeo.

“Hongereni sana kwa ushiriki wenu mzuri mliouonyesha katika kuchangia miradi ya maendeleo. Kazi kubwa mmeifanya nyinyi wenyewe mkilinganisha na fedha mlizozipata kutoka serikalini.”

Naye Mtendaji wa kijiji cha Namalandula Abel Peter amesema jumla ya fedha iliyotumika kuanzia msingi hadi hatua ya upauaji ni shilingi 18,913,800/=, mfuko wa jimbo shilingi 900,000 na halmashauri ilitoa mabati 220.

Afisa Mipango wa Wilaya Sylvia Rwehabura alisema kuwa miradi yote inayoibuliwa na kutekelezwa kwa nguvu za wananchi halmashauri ipo tayari kutenga fedha kwa ajili ya ukamilishaji.

Miradi mingine iliyotembelewa na Mkuu wa Wilaya ni pamoja na Ujenzi wa matundu 17 ya vyoo shule ya msingi Nasiluluma na ujenzi wa kituo cha afya Namonge.