Dkt. Biteko awataka watumishi wa umma kutimiza wajibu wao.

Imewekwa: September 25th, 2023

Naibu Waziri Mkuu na Waziri wa Nishati, Dkt. Biteko  amewakumbusha Watumishi wa Umma nchini kutimiza wajibu wao ili kuhakikisha dhamira ya Rais ya kuwahudumia Watanzania na hasa wa hali ya chini inafikiwa.

Dkt. Biteko ameyasema hayo leo tar 25 Septemba, 2023 alipokuwa akiwahutubia mamia ya wakazi wa Kata ya Bulega katika uwanja wa Shule ya Msingi Bulega ambapo ameendelea kumshukuru Rais kwa Imani kubwa kwake na kumuahidi mbele ya wananchi wa Bukombe juu ya  kuendelea kufanya kazi kwa bidii zaidi.

Aidha amewaomba wananchi wa Wilaya ya Bukombe kumuunga mkono na kumuombea Rais Wa Jamhuri ya Muungano wa Tanzania Dkt. Samia Suluhu Hassan kutokana na mambo makubwa anayoyafanya si tu Bukombe bali Tanzania kwa Ujumla.

Katika Mkutano huo, Mhe Biteko ameeleza Miradi mikubwa iliyojengwa Bukombe pamoja na ile  inayoendelea kujengwa kutokana fedha nyingi zinazotolewa na Rais  ikiwemo ujenzi wa Chuo cha VETA, shule mpya za Sekondari, shule za Kidato cha tano, vituo vya Afya, Barabara, Miundombinu ya Maji ikiwa ni pamoja na kuwaaahidi wananchi wa Bulega juu ya ukarabati wa shule ya msingi Bulega, ununuzi wa gari la kubebea wagonjwa katika kituo cha afya Bulega na kukamilisha zahanati ya Kakoyoyo.

Katika Mkutano huo Dkt. Biteko ameambatana na Mwenyekiti wa UWT Taifa mama Marry Chatanda, Mwenyekiti wa CCM Mkoa wa Geita, Wabunge pamoja na viongozi mbalimbali wa wa Chama na Serikali.