ELIMU YA BIMA YA AFYA ILIYOBORESHWA [iCHF]

Imewekwa: November 4th, 2023

Diwani wa Kata ya Bulega  Mhe. Erick Kagoma imeitaka Ofisi ya Mganga Mkuu wa Wilaya ya Bukombe kuhakikisha inaendelea kutoa  Elimu ya Bima ya afya iliyoboreshwa ili wananchi waweze kujiunga kwa wingi na  kupata huduma bora katika vituo vyote vya kutolea huduma za afya ndani ya Halmashauri ya Wilaya ya Bukombe.

"Hakikisheni elimu ya Bima ya Afya inaendelea kutolewa ili wananchi wetu waweze kupata matibabu bila changamoto yoyote."

Kagoma ameyasema hayo tarehe 3 Novemba, 2023 wakati wa uwasilishwaji wa taarifa ya utendaji kazi wa Idara ya Afya, Ustawi wa Jamii na Lishe kwa kipindi cha robo ya kwanza Julai - Septemba kwa mwaka wa fedha 2023/2024.

Kwa upande wake Nestory Method ambaye ni Mjumbe kutoka Hospitali ya Charles Kulwa alisema kuwa atahakikisha anashirikiana Mratibu wa Bima ya Afya iliyoboreshwa katika zoezi la kuwahamasisha wananchi ili waweze kujiunga na bima hiyo.

Naye Mganga Mkuu wa Wilaya ya Bukombe Dr. Deograsia Mkapa wakati akitoa taarifa ya hali ya uchangiaji wa huduma za afya katika vituo vya Umma kwa kipindi cha Julai - Septemba alisema jumla ya wateja 2,984 waliyohudumiwa walikuwa ni wateja wa Bima ya Afya kati ya wateja 19,188 katika vituo vyote vya Umma.

Bima ya Afya iliyoboreshwa [iCHF] ni Bima ya Afya iliyoanzishwa na Serikali ya Tanzania chini ya Ofisi ya Rais Tawala za Mikoa na Serikali za Mitaa [TAMISEMI] kwa kushirikiana na Wizara ya Afya, Maendeleo ya Jamii, Jinsia Wazee na Watoto.