EWURA Watembelea Mradi wa Bomba la Mafuta

Imewekwa: March 1st, 2023

Wajumbe wa Bodi ya Wakurugenzi wa Mamlaka ya Udhibiti wa Huduma za Nishati na Maji ( EWURA) wakiongozwa na Mwenyekiti wa Bodi Prof.Mark James Mwandosya tarehe 28 Februari, 2023 wametembelea  halmashauri ya Wilaya ya Bukombe ili kujionea  maendeleo ya utekelezaji wa Mradi wa Bomba la Mafuta.

Akiongea wakati wa kikao cha ndani katika Ofisi ya Mkuu wa Wilaya Mwenyekiti wa Bodi Prof. Mark Mwandosya alisema halmashauri ya Wilaya ya Bukombe katika mradi wa Bomba ni eneo la kipaumbele kwa ajili ya ujenzi wa kambi ya wafanyakazi na kutunzia vifaa vya ujenzi hivyo wananchi wajiandae kwa ajili ya ulinzi wa miundombinu pamoja na kuumiliki mradi na kuona ni wa kwao.

Mkuu wa Wilaya ya Bukombe Mhe.Said Nkumba alisema Mradi wa Bomba la Mafuta katika halmashauri ya Wilaya ya Bukombe umewashirikisha wananchi  kwa asilimia mia moja kwani wanaujua mradi vizuri na utaratibu wa ugawaji fidia umemshirikisha kila mwananchi.

Halmashauri ya Wilaya ya Bukombe ni miongoni mwa Wilaya ambayo itapitiwa na ujenzi wa Mradi wa Bomba la Mafuta kwani mpaka sasa Mkandarasi amekwishapatikana na ulipaji wa fidia kwa wananchi kwa ajili ya kupisha eneo la mradi umefikia asilimia 90.