Gharama za Kuunganisha Huduma ya Maji Ziwe Rafiki

Imewekwa: January 17th, 2023

Mwenyekiti wa Halmashauri ya Wilaya ya Bukombe Mhe.Yusuph Mohamed Yusuph mmoja wa wajumbe wa kamati ya Siasa Wilaya amemtaka Mkurugenzi wa Mamlaka ya Maji Ushirombo kuhakikisha bei ya kuunganishwa na huduma ya maji inakuwa rafiki ili wakazi wa mji wa Ushirombo waweze kunufaika na mradi wa Uboreshaji wa Huduma ya Maji katika Mji wa Ushirombo.

"Ni matamanio yangu kuona wakazi wote wa mji wa Ushirombo wanaunganishwa na huduma ya maji safi na salama kwa gharama nafuu kupitia mradi wa uboreshaji wa huduma za maji katika mji wa Ushirombo."

Yusuph ameyasema hayo tarehe 16 Januari, 2023 wakati wa ziara ya kamati ya siasa Wilaya ya kutembelea na kukagua miradi ya maendeleo.

Akitoa taarifa ya utekelezaji wa mradi huo  Mkurugenzi Mtendaji Mamlaka ya Maji Ushirombo  Getruda Deogratius alisema mradi wa Uboreshaji wa Huduma ya Maji katika mji wa Ushirombo unatarajia kuhudumia wakazi wapatao 29,672. Chanzo cha maji katika mradi huo ni visima viwili virefu vyenye uwezo wa kuzalisha maji jumla ya lita 19,700 kwa saa na hadi sasa mradi huu umakamilika kwa asilimia 95. 

Aidha aliendelea kusema kuwa  mradi huo utakapokamilika utapunguza muda wa kufuata maji umbali mrefu ambapo  muda huo utatumika kufanya shughuli nyingine za kiuchumi pamoja na kupunguza uwepo wa magonjwa yanayotokana na matumizi ya  maji yasiyo safi na salama kama vile kuhara, homa ya matumbo na kipindupindu.

Naye Mwenyekiti wa Kamati ya Siasa Wilaya Matondo Lutonja  ameupongeza uongozi wa Mamlaka kwa usimamuzi mzuri wa mradi huo, vile vile ameshauri kuwa matangazo yatolewe ili wananchi waweze kufahamu uwepo wa huduma ya maji safi na salama na kisha kuunganishiwa.

Mradi wa Uboreshaji wa huduma ya maji katika mji wa Ushirombo unatekelezwa kwa mikataba mitatu (Mkandarasi wa ujenzi, Mzabuni wa pampu na mzabuni wa bomba) kwa gharama ya shilingi 859,395,343.85 chini ya program ya Maendeleo kwa Ustawi wa Taifa na mapambano dhidi ya Uviko - 19 pamoja na Malipo kulingana na Matokeo (EP4R).