“Halmashauri shughulikieni malalamiko ya Walimu” DC Nkumba

Imewekwa: October 9th, 2018

 Maadhimisho ya Siku ya Walimu Duniani kimkoa yamefanyika Wilayani Bukombe tarehe 5/10/2018 huku mgeni rasmi akiwa Mkuu wa Wilaya ya Bukombe Mhe.Said Nkumba.       Mkuu wa Wilaya ya Bukombe Mhe.Said Nkumba ameitaka Halmashauri kushughulikia malalamiko yote ya Walimu hususani kuhusu upandishaji madaraja, vitambulisho kwa walimu na mazingira rafiki kwa walimu ambayo yalisomwa kwenye risala iliyowasilishwa na Katibu wa Chama cha Walimu Tawi la Bukombe Ndugu Zephania Sabuni.

Aidha Mkuu wa Wilaya amewasisitiza walimu kufanya kazi kwa kuzingatia maadili ya Ualimu na kuacha kujihusisha na vitendo ambavyo havina sifa nzuri kwa walimu, ”Mimi nilikuwa Mwalimu kabla sijawa Mbunge kwa Miaka 15 na Sasa ni Mkuu wa wilaya, nilizingatia maadili ya utumishi wa ualimu ndiyo maana nimefika hapa nilipofika” alisema Mkuu wa wilaya.

Katika Maadhimisho hayo Kaimu Mkurugenzi Mtendaji Ndugu Joseph Machibya amesema sasa walimu Wilayani Bukombe kupata Vitambulisho katika Mwaka wa fedha 2018/2019 “Lalamiko hili limekuwa la muda mrefu lakini kwakuwa tulikuwa tunatekeleza miradi ya Maendeleo ya jamii tukaona sasa umefika wakati wa kuhakikisha kila mwalimu anapata Kitambulisho kwa mwaka wa fedha 2018/2019 kwa kuwa lipo ndani ya uwezo wa Halmashauri “ alisema Kaimu Mkurugenzi.

Naye Afisa Utumishi Grevas Nkononziku amesema Halmashauri inasubiria kibali kutoka kwa Katibu Mkuu Utumishi wa Umma sababu walisitisha kwa ajili ya uhakiki wa vyeti 2016, ila sasa Halmashauri imepokea kibali cha kupandisha madaraja kwa watumishi wote waliojiendeleza tu kwa lugha ya kigeni(Recatogarization). Pia Afisa Utumishi aliongeza kuwa watumishi waliokuwa wamepanda madaraja lakini zoezi hilo likasitishwa 2016, wameanza kupandishwa madaraja tena baada ya kupokea kibali toka Ofisi ya Utumishi wa Umma ambapo watapandishwa kwa awamu.

Katibu wa TSC Ndugu Francis Sungura amewataka walimu kuendelea kuchapa kazi kwa kufuata maadili ya ualimu bila kushiriki vitendo ambavyo vitahatarisha ajira yake na kuweka dosari mbaya katika taaluma makini ya ualimu, “Walimu wa kiume kujihusisha kimapenzi na wanafunzi hili ni kosa lisilokubalika kabisa katika maadili ya ualimu hata ya kijamii, tuzingatie maadili yetu walimu” alisema Sungura