''Hongereni Bukombe kwa usimamizi wa kizalendo''

Imewekwa: October 9th, 2021

Kiongozi wa Mbio za Mwenge Kitaifa Luteni Josephine paul Mwambashi ametoa pongezi kwa Uongozi wa Wilaya kwa usimamizi wa kizalendo katika mradi wa Mfumo wa GoTHoMIS Lite uliogharimu kiasi cha shilingi Milioni 54.

Pongezi hizo amezitoa leo tarehe 9 Oktoba, 2021 wakati wa kuona Matumizi sahihi ya TEHAMA katika mfumo mpya wa GoTHOMIS Lite.

"Hongereni sana kwa usimamizi wa kizalendo kwani mradi huu utasaidia kutunza kumbukumbu za wagonjwa kwa njia ya kielektroniki na kuongeza mapato ya hospitali"

Aidha ameutaka uongozi wa Wilaya kuhakikisha mfumo huo unafungwa kwenye vituo vyote vya kutolea huduma za afya.

Akisoma taarifa za mradi huo Mganga Mfawidhi Dr.Range Nyamhanga amesema mradi huo umesaidia kuongeza mapato ya hospitali, umeimarisha udhibiti wa matumizi ya ugawaji dawa kwa wagonjwa, umepunguza muda wa kutoa huduma kwa mteja, umepunguza gharama ya matumizi ya karatadi pamoja na wino na umeimarisha utunzaji wa kumbukumbu na taarifa za wagonjwa pamoja na fedha za makusanyo.

Mwenge Maalumu wa uhuru 2021 umezindua mradi wa maji Buganzu, vyumba 2 vya madarasa shule ya msingi Uyovu, klabu ya wapinga Rushwa, klabu ya kupinga matumizi ya madawa ya kulevya, umeona mapambano dhidi ya Maralia, mradi wa uzalishaji mali wa kikundi chaVijana cha Runzewe Youth Innitiative Group, uendelevu wa ujenzi wa barabara ya lami Ushirombo Mjini, matumizi ya TEHAMA na kuweka jiwe la Msingi ujenzi wa kiwanda cha kuchakata na kufungasha mazao ya nyuki.

Mwenge wa Uhuru Wilayani Bukombe umezunguka kilometa 86 na kuzungukia miradi 10 ya wananchi.

Kauli mbiu ya Mbio za Mwenge wa Uhuru kwa mwaka 2021 ni "TEHAMA ni Msingi wa Taifa endelevu; Itumie kwa usahihi na uwajibikaji."